Tangka man·gipa gariara CM-ni dol ong·ja ine NPP aganchaka
SHILLONG: Bristibar salo, Meghalaya a·dokni Chief Minister aro National People’s Party (NPP)-ni president Conrad K Sangma-ni Arunachal Pradesh a·doko election campaign ka·na re·angani somoio uni dol baksa ja·rikpaenggipa gari bolsaoniko election official-rang, gong kror 1-na baten tangkarangko rim·aha indiba ia gariara Chief Minister-ni doloni ong·ja ine NPP jegalatskaaha.
Ia gariko, Arunachal Pradesh a·dokni Longding a·jao donggipa Kanubari check post-o rim·ahachim.
Longding a·jani Superintendent of Police (SP) Dekio Gumja-ni kobor ra·timgiparangna u·iatani gitade, ia gariara Assam-o register ka·gipa AS-01ET 5252 Fortuner gari ong·achim aro ia garioniko election official-rang, gong kror 1.25-mangni gita tangkarangko man·ahachim.
Indake ong·engon, ia gariara Chief Minister Conrad K Sangma-ni dol baksa re·anggipa gari ong·ja indiba uni sepango re·anggipa garisa ong·achim ine Longding a·jani SP-ba parakataha.
Ia tangka aro gariara Badri Rai & Construction Ltd-ni Executive Director Harshvardhan Singh-nisa ong·achim ineba Gumja parakataha.
“Ia tangkarangko election-na dongimin flying squad aro static surveillance team-rang rim·aha aro tangkarangko SBI-ona watatchengaha. Ia case-ko chinga jako ra·jawa maina iakode Income Tax department-ni gitasa jako ra·gen. Chingni kamde gong 50,000-na batgipa tangkarangko rim·ani aro mokordoma ka·anisan ong·aia,” ine Gumja aganaha.
Indake ong·engon, ia garioniko kror 1 batpile tangkarangko man·ani ja·man dingtang dingtang media-rango Chief Minister aro NPP-ni national president Conrad Sangma-ko biming mingahani gimin NPP raken jegalatskaaha.
NPP-ni ku·wattimgipa Himalaya Shangpliang-ni kobor ra·timgiparangna parakatani gitade ua somoio a·dokni NPP-ni president, April-ni 19 tariko ong·atenggipa Arunachal Pradesh Assembly election-o NPP-ni candidate ong·susaenggipa mandena campaign ka·na re·angengachim.
Ia garioniko kror 1 batpile tangkarangko man·ani ja·man NPP-ni national president-ko badiaba badiaba media-rang biming mingahani gimin jegalatengon, tangka baksa rim·a man·gipa gariara NPP-ni president aro Chief Minister Conrad Sangma baksa apsan re·pagipa doloni ong·ja indiba ia dolni janggilo re·bapaenggipa garisa ong·achim ine Shangpliang parakataha.
Arunachal-oba Assembly election-na Model Code of Conduct-ko donahani gimin niamo pangchake NPP-ni national president-ko salangenggipa gari aro ia dolni pilak garirangkon election official-rang check ka·aha aro maming niam pe·anirangko man·jaha ineba Shangpliang talataha.
“Kanubari check post-oba chief minister-ni gari aro ia dolni pilak garirangkon flying squad, static surveillance dolrang aro police-rangba check ka·riken watatahani gimin uamang joljol re·angaiaha aro ja·mano koborrangko niksoani ja·mansa ia garioniko ia tangkarangko man·aha ineba uamang ma·sina man·aha,” ine NPP-ni ku·wattimgiparang parakataha.