SHILLONG: Meghalaya a·doko BJP-ni mitam dilgiparang, BJP-ni state president Rikman G Momin-ni kamo suk ong·nikjae kam watchina dabitokengon, uko kam watchina dabianiara nanga ong·ja aro kraaniba ong·ja ine BJP-ni dilgipa aro a·dokni Cabinet Minister AL Hek parakataha.
Hek-ni kobor ra·timgiparangna parakatani gitade, BJP-ni state president Rikman Momin, BJP high command-ni ge·etanikosa dakengani gimin uko kam watchina dabianide kraani ong·jaengachim.
Meghalaya a·dokni Lok Sabha constituency damgnio susana gita ma·mongni dilgiparangko didijahani gimin a·doko aro mongsongbate Garo Hills-o BJP-ni mitam dilgiparang, Momin-ni kamna suk ong·gijaniko paraktokahachim.
“Iani bidingo angade state president Momin-ko matnangna man·jawa. Ua kamtangko adita jarangna skangsan jako ra·aha aro jeko ma·mongni dilgiparang ge·etengachim ukode ua dakna nangaon ga·akaigen,” ine Hek aganaha.
BJP-ni state president Rikman Momin, an·tangna tikatgimin daitorangkosa chu·sokatenga ineba ua Momin-na chake aganangkuaha.
Ia bilsini Lok Sabha election-o a·dokni damgni Lok Sabha seat-rang, mongsongbate Tura Lok Sabha constituency-o susagija NPP-ni candidate-na chakskana gita BJP-ni tik ka·ani gimin Garo Hills-o BJP-ni mitam dilgiparang suk ong·tokjaengachim.
Ia bilsini Lok Sabha election-na indita bilsi rakbee kamrangko ka·soanirang indin ong·gramaiaha ine uamang aganahachim.