TURA: Meghalaya a·dokni Lok Sabha seat damgnion susagija National People’s Party (NPP)-na chakpaaniko on·na BJP-ni high command tik ka·angani ja·man Garo Hills-o BJP-ni bang·bea membor-rangan, Trinamool Congress (TMC)-ni candidate Zenith M Sangma-na kamko ka·skana gita napangtokaha.
Trinamool Youth Congress-ni dilgipa Richard Marak-ni parakatani gitade, Robibar salo BJP-ni sak 1500-na baten membor-rang aro BJP-na kam ka·giparang TMC-o napangaha.
“Robibar salo sak 1500-na baten songadam nokadamrango BJP-ko dilenggiparang aro kamrangko ka·enggiparang Trinamool Congress-o napangaha aro chinga uamang sakprakprakon kusi ong·bee rimchaksoaha,” ine Marak parakataha.
Marak-ni parakatani gitade, TMC-o napanggipa BJP-ni membor-rangara, Salmanpara Assembly constituency-ni ning·o donggipa Tarapara aro Magurmari jolrangoni ong·achim.
“Tarapara-oni sak 500-na baten aro Magurmari-oniba sak 700-na baten TMC-o napangaha. Ian TMC-ni namroro silroroaniko ra·bana niksamsoe kam ka·anio bakrimaniko mesokani ong·aha,” ine Marak parakataha.
BJP-ni membor-rangko a·dokni gitcham minister aro TMC-ni candidate Zenith M Sangma an·tangan TMC-ona rimchaksoaha.
