TURA: 4th teacher-rangni dormaharangko bariatchina aro skigiparangko kamo regularise ka·china dabie changni chang memorandum-rangko on·angani ja·manoba skigiparangni dabianirangko chu·sokatchipjaengani gimin Mongolbar salo, All Meghalaya 4th Teachers Association (AM4thTA) Garo Hills unit-ni membor-rang, a·dokni Chief Minister Conrad K Sangma-ko Williamnagar-o grongenba, memorandum-ko on·angtaiaha.
4th teacher-rangni Chief Minister-na on·anggipa memorandum-o parakatani gitade, 2017 bilsini January 1 tarikonin a·dokni gipin skigiparangde japrako gong 20,493/- ka·e dormahako man·engaha indiba 4th teacher-rangde gong 12,000/-kosan man·engachim indiba adita salrangna skangmangmangsan 4th teacher-rangnaba dormahako japrako gong 18,000/-ona bariataha.
“Dakchakgipa skigiparang aro 4th teacher-rang pilakan apsan poraiani gadang donge apsan kamkon ka·enggiparang ong·achim indiba 4th teacher-rangnade dormahako komibate on·engkua aro ia sal somoirango bosturangni dam namen rakengahaon gong 18,000 dormahachi nokdang chalaianiara namen neng·beani kam ong·engaha,” ine AM4thTA GHU-ni dilgiparang parakatenba, 4th teacher-rangnaba a·dokni gipin skigiparang gitan apsan dormahako on·china a·dok sorkariko mol·molataha.
Meghalaya a·dokni sak 1521 4th teacher-rangkoba kamo regularise ka·china gita ru·uta bilsirangonin skigiparang dabiengachim indiba da·alonan ia dabianiko sorkari chu·sokate on·chipkujaenga ineba 4th teacher-rangko ta·raken kamo regularise ka·china gita AM4thTA-GHU, a·dok sorkariko didiataha.
“Chingaba assistant teacher-rang gitan apsan poraiani gadang donge apsan kamko ka·enggiparang ong·a indiba iandake 4th teacher-rangna dormahako komibate on·aniara 4th teacher-rangko onchepe ra·ani gita ong·enga,” ine association-ni president Tengsrang K Sangma parakatenba, 4th teacher-rangnaba assistant teacher-rang gitan apsan dormahako on·china sorkariko didiataha.
SSA-ni ning·o skie on·enggipa sak 1514 4th teacher-rang, jemangan chu·onga gita poraiani gadang donge ru·uta bilsirangna dangdike on·engachim, iandakgipa 4th teacher-rangko ta·raken kamo regularise ka·china gitaba AM4thTA GHU, a·dok sorkariko didiataha.