SHILLONG: Umsning-ni KHADC MDC Macdalyne Mawlong-ni nokko ro·ong goanio jak donggipa manderangko police-rang rim·na man·kujaenga.
Ri Bhoi a·jani Umsning-o donggipa Mawlein Mawkhan (Sohkyndur)-o MDC-ni nokko ma·sina man·gijagipa manderang ro·ong gogrimahachim ine nikna man·a.
Indake ong·engon, ia MDC-ni nokko ro·ong goanio jak donggipa manderangko da·o dipet police-rang rim·na man·kujaenga ine Bristibar salo, Ri Bhoi a·jani SP Jagpal Dhanoa, kobor ra·timgiparangna parakataha.
Koborko on·ani gitade, ua somoio Umsning-ni MDC an·tangan nokni a·palo chadenge roengachim indiba rasong gnange ua saknaanirangko man·jaha.
“Ro·ongrang angko nanggenchimode anga bilongen saknaanirangko man·naba gnangchim indiba rasong gnange ango ro·ongrang nangejaha,” ine MDC Macdalyne Mawlong talatenba, iani bidingo ua police-rango FIR ka·aha ine parakataha.
Ua somoio ro·ongrang ukode nangejaha indiba uni mikron samba gitan ro·ongrang til·angenba kelkini ainarangko nangeaha ineba Mawlong parakataha.
“Oe beben ro·ong goanio darangba saknaanikode man·jaha indiba angni nokko bewalan nosto ka·aha,” ine ua aganaha.
Indake ong·engon, iani bidingo MDC dos dakgipa manderangko aganna man·jaenga indiba badiaba manderangkode chanchichipenga ine police-rang parakatskaaha.
MDC-ni chanchichenggipa manderangko police-rangna biming minge on·aha ineba police officer parakataha.
Ia a·sel ong·ani somoio Umsning-ni MDC, nok a·palo phone ka·engachim ineba police-rang parakataha.