SHILLONG: Tom·tomanina agangrikna re·bachina gita Sorkari okamgipani bidingo champengako man·gipa Hynniewtrep National Liberation Council (HNLC), da·o dipet mamingkoba aganchakkujaenga.
HNLC-ni palo aganchakenggipa Sadon K. Blah-o sing·aton, da·o dipetode bobil doloniko maming aganchakatako man·kujaenga inesa aganaha.
Tom·tomanina agangrikaniko dakna gita a·dok sorkari da·oba bobil dolna do·gako oe donenga ine adita somoirangna skangsan Deputy Chief Minister Prestone Tynsong aganahachim.
“HNLC bobil dolko tom·tomaniona agangrikna re·baaniko nangnikenga,” Tynsong aganaha.
Uni aganani gita, bebegita HNLC agangrikaona re·bana nangnikjaode niam ain, a·doko dongtaigen.
