SHILLONG: East Jaintia Hills a·jao nosto ong·e dongenggipa National Highway (NH-6) ramako taripiltaina gita National Highway Authority of India (NHAI), ma·mong sorkarina proposal-rangko on·manaha ine a·dokni Chief Minister Conrad K Sangma parakataha.
“NH-6 ramako tarina gita NHAI, ma·mong sorkarina proposal-rangko on·atmanaha. Mitam proposal-rangkode ma·mong sorkari ra·chakmanaha aro mitam bakrangode kamrangko a·bachengataha,” ine nosto ong·e dongenggipa NH-6 ramako tariani bidingo sing·anina Chief Minister aganchakaha.
“Chinga kamrangko ka·engaha aro iani bidingo NHAI baksa agangrikjringenga. Kamrang mitamde a·bachengaha, mitamnade tangka paisarangko chamataha aro mitamnade proposal-rangko niengkua,” ine Sangma aganaha.
East Jaintia Hills a·jao Lad Umroi-oni Malidor-ona dakanggipa NH-6 ramani bakrangko four-lane dake taridapna sienga ine adita salrangna skangsan, a·dokni Deputy Chief Minister aro PWD (Roads) Minister Prestone Tynsong parakatahachim.
Ia kamrangko National Highways & Infrastructure Development Corporation Limited (NHIDCL)-na pakwatmanaha aro uamang biaprangko basena gita survey-rangko ka·engaha aro nangchakegipa deputy commissioner-rang baksa agangrikengaha ineba ua aganahachim.
NH-6 ramako tariani bidingo janapatengon, ia rama, mongsongbate Lumshnong-oni Umkiang-ona dakanggipa bakrang namsrangjahani gimin adita salrangna skangsan ua Road Transport Ministry-ni secretary-ko grongenba agangrikaha ine Tynsong parakatahachim.
NH-6 ramani, mongsongbate Lumshnong-oni Malidor-ona dakanggipa NH-6 ramani bakrang namsrangjahani gimin ia ramako tarina gita ta·raken ja·kurangko de·china East Jaintia Hills a·jani Joint Action Committee (JAC)-ba a·dok sorkariko didiatahachim.