SHILLONG: Ia sal somoirango Meghalaya a·dokni pilak biaprangon chiring chibisikrang tiproroangenganichi manderang chirangko chu·onga gita man·tokjaengahaon, chiring chibisikrangoniko an·cheng aro ma·manti a·ningni bosturangko bikotengani a·sel nangchakeaniko man·batenga ine sorkari ku·rachakaha.
Mongolbar salo, a·dokni PHE Minister Marcuise N Marak-ni parakatani gitade, chiring chibisik donggipa biaprangoniko an·cheng aro ma·manti a·ningni bosturangko niam gri bikotengani a·selba chiring chibisikrang tiproroangengahani gimin iandakgipa kamrangko champengna sorkari ja·ku de·chakatengaha.
Iandake an·cheng aro ma·manti bosturangko kite cha·aniba manderangni janggi tangani cholrangan ong·achim ine janapatskaengon, manderang an·cheng kite cha·anio pangchake dongaijachina gita sorkari, ia manderangna dingtang janggi tangani cholrangkoba on·na miksongenga ine Marak parakataha.
Ia manderangna mai dakgipa janggi tangani cholrangko on·skana miksongenga ine sing·on, da·o dipet iani bidingo u·i-ma·sigipa manderang am·sandianirangko dakengkua aro uamang kamrangko matchotahaon sorkarini gita chanchirimanggen ine PHE Minister parakataha.
Ia sal somoirango mikka waanirang chu·ongjaengan baksana chibisik donggipa biaprango a·ba o·e cha·ani aro chibisik kosakrango ro·ongrangko bikotengani a·selba chiring chibisikrang tiproroangengahachim ine nikna man·a.
Chibisikrangko chel·chake rakkina nangengani gimin a·dokni Water Policy-o janapanirangko nikna man·engoba da·o dipet iandakgipa chibisikrangko chel·chake rakkina gita sorkarini maming ja·ku de·anirangkode nikna man·skakujaengachim.
Indake ong·engon, a·ningo chirangko napatna man·na gita sorkari, mikka chirangko chimonge rakkina gitaba ja·kurangko de·enga ine PHE Minister parakatskaaha.
“Ia kamko sorkari ra·gatmanaha aro iana da·o report-ko tariengaha. Report-rangko nipiltaiahaon iani bidingo chinga manderangko didina gita jotton ka·gnok. Ian altubegipa kamsan ong·aia, jeon an·ching pokkrirangko kitenba mikka chirangko pokkriona watate, a·ningo chirangko rakkina man·gen,” ine Marak aganaha.
Ia sal somoirango mikkarang waenganichi chiring chibisikrang tangpiltaina a·bachengengahani gimin an·tangni kusi ong·aniko parakatengon, chibisikrangko tange rakkina gita pilak cholrangkon jako ra·china pilak department-rangnan ge·etaniko on·manaha ine PHE Minister parakataha.