TURA: An·tangtangni man·gninamangmang chanchie matchu, wak, matma, do·bok aro uandakgipa matburingrangko ka·saninggija dake jakkalenganina Garo Hills-ni Centre for Environment Protection & Rural Development (CEPARD) jegalatenba, iandake matburingrangni kosako ka·saninggija dake jakkalaniko champengna ja·ku de·chakatanggen ine parakataha.
Matchu, wak aro uandakgipa jilla kaanirangko bading chiwalanio manderangni ka·saninggija dake garirango salruraanirangko nikna man·engachim. Adita salrangna skangsan Assam-oba iandake baditaba mang matchurangko, chonbegipa gari bolsao sikketkete gipin biapona salangengmitingko Assam-ni police-rang jokatna man·ahachim.
Indake ong·engon, matburingrangko iandake ka·saninggija dake jakkalengani gimin CEPARD, matchu matte bading chiwalgipa manderangni kosako jegalatenba, jilla kaanirangko man·chape janggi gnanggipa pilakni namgninan kamrangko ka·na ja·ku de·chakataha ine parakataha.
“Ia ja·ku de·chakatanio chinga iandake matburingrangni kosako, mongsongbate jilla kaanirangko ka·saninggija dake jakkalaniko District Administration-na report ka·na tik ka·aha. Iandake ka·saninggija dake jakkalaniko official-rangna u·iatanichi chinga matchu, wak aro uandakgipa jilla kaanirangko naljokatna miksongenga,” ine CEPARD-ni president Samgar R Sangma parakataha.
Matburingrangni kosako iandake ka·saninggija dake jakkalaniko champengna uamang, People for the Ethical Treatment of Animals (PETA) baksa nangrime kamrangko ka·na tik ka·aha ineba CEPARD-ni president parakataha.
Matburingrangni kosako ka·saninggija dake jakkalaniko champengna ja·ku de·anio Garo Hills-ni manderangkoba uamang baksa bakrimchina Sangma didiataha.