TURA: East Garo Hills a·jani Dawa Gittinggre aro Nengsep Gittimo Jal Jeevan Mission (JJM)-ni kamrangko matchotaoni jagni ong·pilengahaoba songni manderang da·onan chi tingtotsakoba man·kujaenga ine Williamnagar-ni saksa Nilbath Ch Marak-ni matnanganirangna East Garo Hills a·jao PHE Simsanggre Division-ni Executive Engineer talataniko on·ataha.
Executive Engineer-ni parakatani gitade, ia song damgnina, chong·motan Dawa Gittinggre aro Nengsep Gittim songrangna JJM scheme-ni ning·o chirangko on·na gita aro kamrangko nirokna gita 2022 bilsini June jaon Village Water & Sanitation Committee (VWSC)-na pakwate on·manahani gimin chi watani somoi aro chonchongipa taridapna nanganirangkode PHE ong·gija VWSC-rangan jako ra·ani ong·achim.
Ia song damgnina PVC pipe-rangkosa sale on·aha ine matnanganina aganchakaniko on·atskaengon, ia project-na jakkalgipa chi pipe-rangara sorkarini ra·chakgimin HDPE pipe-rangsa ong·a aro PVC pipe-rang ong·ja ine PHE official-rang parakataha.
“Je biaprangon a·a cho·na permission-ko man·a, uandakgipa biaprangode a·ning gitasa chi pipe-rangko sale on·aha aro ia kamrangko songtangtango donggipa VWSC-rangni nirokanion ka·aha,” ine PHE Simsanggre Division-ni Executive Engineer, talataniko on·atenba, songni VWSC-rangkode PHE songja indiba songni manderang an·tangtangsa songa ine parakataha.