SHILLONG: Shillong Polytechnic-o Civil Engineer-ko poraienggipa chatri Diana Dimre Ch Marak-ni siani bidingo uni ma·drangrang, ning·tue sandirokchina dabiahani gimin East Khasi Hills a·jani police-rang da·o ia a·selko register ka·enba sandirokna gita a·bachengataha.
“Sianggipa chatrini ma·drangrang dabiahani gimin chinga Women police station-o mokordomako segatenba sandirokna a·bachengataha,” ine East Khasi Hills a·jani Superintendent of Police (SP) Rituraj Ravi parakataha.
Shillong Polytechnic-o poraienggipa Diana Dimre Ch Marak, ‘an·tangko so·ote sia’ ine agananiko Chambugong aro Tegite Maharirang jegalatenba, iani bidingo kakketko ma·sina inquiry-ko dakchina gita adita salrangna skangsan FIR ka·doangahachim.
FIR-o Chambugong aro Tegite Maharirangni parakatani gitade, re·anggipa May-ni 6 tarik pring 3:00 bajimango Shillong Polytechnic-o kam ka·enggipa mande saksa, Diana Dimre Marak an·tangko so·ote siaha ine sianggipa me·chikni abitangna phone gita aganataha aro ian uni nokdangna aro uni ma·drangrangna namen jagokmanpilani ong·aha.
Police-rangba ia a·sel ong·aniko ‘suicide case’ inesa ra·ahani gimin songbadrangoba ia me·chik bi·sako so·ote sia ine setokahachim.
Indake ong·genchimoba, Diana Dimre-ni manggisiko Tura-ona da·o uamangni dongchakenggipa Dakopgre-ni MSME residential quarter-ona ra·baani ja·man uni manggisiko gopna skang auatengmiting somoiosa uni gitok mikkango kamani chin, jak samgnion mata bu·ani chin, gitok janggilo matani chin aro jakrani jakskuoba mata bu·ani chinrangko nikna man·aha ine FIR-o janapataha.
“A·sel ong·na skang May-ni 5 tarikoba Diana Dimre, an·tangni ma·a paana phone ka·atenba, institute-oni ong·katangenggipa chatro chatrirangna farewell program-ko name chu·sokatna man·jahani gimin uni ripengskarang ukosa matnangtokenga ine u·iatahachim. A·sel ong·ani sal, chong·motan May-ni 6 tarik saloba uko uni ripengskarang dokkol ka·enga ine ua an·tangni ma·gipana aganataha aro ma·gipa uko sing·aton ua grapasa grapaiaha indiba uko an·tang baksa apsan porairimenggipa chatrirang ka·mikkenatenga ine ua aganataha. Uni gimin unsalo saoba uni sepango salgimikan dongkamaiaha aro uko dontonggija ka·mikkenataha ine ian uni ma·a paarangna aro uni ma·drangrangna chanchichipaniko ong·katataha,” ine Chambugong aro Tegite Maharirangni FIR-o janapataha.
Diana Dimre-ni manggisiko, uni nokdangni manderang ba ma·drangrangni dongpaani gri ra·onahani giminba Chambugong aro Tegite Maharirang, suk ong·gijaniko parakataha.
“Diana Dimre Ch Marak-ni manggisiko uni nokdangni manderang aro maharini manderang dongpaani grisa kelki kapenggipaoniko ra·onaha aro ian niamni kosako ong·a. May-ni 6 tarik pring 2:00 bajimango uni room mate ba apsan kuturio dongpaenggipa chatri an·tangan uko ka·dimeatna jotton ka·ahachim ine a·kangani ja·manba uni siakode ma·simikjaha. Unwalo hostel-ni warden-ba dongjae ua (Diana) darangni dakchakanikoba man·jaha aro uko so·ote sia ine a·kangenggipa biapara uni kuturioni aditan chel·e staircase donggipa biapsa ong·a aro ian namen chuani gimin feet 5 ong·gipa me·chik bi·sani ia biapona maldoangani kattade namen ong·na amgijani ong·aha. Unbaksana Shillong Polytechnic-ni additional director WL Warjri an·tangde da·alona kingkingan ia a·selni bidingo nokni manderangna agangrikata dongkuja, Diana-ni manggisiko ra·baani somoioba institute-ni darang official-rangan re·bajaha aro da·alona kingkingan Polytechnic official-rangoni ia a·selna condolence message ba kalimani kattarangko on·ataba dongkuja,” ine Chambugong aro Tegite Maharini membor-rang, FIR-o parakatenba, ia a·selko name sandirokchina aro dos donggipa manderangni kosako rakgipa ja·kurangko de·china didiataha.