TURA: Ia bilsini Secondary School Leaving Certificate (SSLC) aro Higher Secondary School Leaving Certificate (HSSLC) Arts porikkao Garo Hills-oniba SSLC-o Top 20-oni saksku aro HSSLC-o Top 10-oni sakgni biapko man·tokaha aro uamangoni mitamrang an·tangtangni chu·sokanirangko Salantini Janera-na parakattokaha.
Ia bilsini SSLC porikkao Top 20-oni skanggipa biapko man·e chu·sokanggipa Sherwood School-ni chatro Anuj Chetry, an·tangni chu·sokgipa ong·anichi skultangna mikkim rasongko ra·bana man·ahani gimin kusi ong·aniko parakataha.
Ia gadangko man·e pass ka·na gita uko sawa didiaha ine sing·on, uni ma·a paa aro skigiparang uko pangnan bimchipe poraichina didiaha aro uamangni didiani a·sel ia namgipa result-ko ua man·paaha ine Anuj parakataha.
Mikkangchi ua Guwahati-o IT-ko poriangkuna miksongenga ineba Anuj parakataha.
Ia chang North Garo Hills a·jaoniba St Thomas Higher Secondary School-ni chatri Wanma Sangma, SSLC-ni Top 20-o brigipa biapko man·e chu·sokgipa ong·aha aro an·tangni chu·sokgipa ong·anina ua Nokgipa Isolko, skigiparangko aro an·tangni nokdangni manderangko mittelpilataha.
Wanma-ni aganani gitade, ua ia porikkao Top 20-o pass ka·gen ine maming ka·dongsoanirang dongjachim aro uandaken result-ko knaon ua namen aiao inmanbeaha.
Ua saksa poraianio namen bimchipgipa ong·a aro pangnan an·tangni lesson-rangko man·e donronga ineba ua aganaha.
“Maikoba ma·sija ong·ode anga pangnan angni skigiparango sing·e sanne ra·ronga aro uamang angna dakchake on·na gita pangnan kusi ong·a,” ine Wanma aganaha.
Mikkangchi ua doctor-ni kamko ka·na miksonganirang dongani gimin da·o joljol ua Science stream-ko ra·e poraianggen ineba Wanma parakataha.
An·tangni chonbatgiparangna agan-ku·pattianirangko on·atengon, pangnan Nokgipa Isolo bebera·china aro chu·sokgipa ong·na skanirang dongchina gita Wanma didiataha.
SSLC porikkao Top 20-oni 19-gipa biapko man·e chu·sokanggipa Sherwood School-ni chatro Arunav Kumar Paul-ba an·tangni chu·sokgipa ong·anina an·tangni Maths aro Science teacher Bishwanath Patra, an·tangni ma·a paa, Sherwood School-ni principal Madam Tasha, gitcham principal Tyrone D’ Brass aro skulni skigiparangko mittelpilataha.
Arunav mikkangchi Astronaut ong·na miksonganirang donga aro da·o ua Science stream-ko ra·e poraianggen ineba parakataha.
SSLC porikkao Top 20-oni 20-gipa biapko man·e chu·sokanggipa Christian Girls HS School-ni chatri Lillian Christiano B Marak-ba an·tangni chu·sokanina skulni pilak skigiparangko mittelpilataha.
An·tangni result-na kusi ong·aniko parakatengon, ua krengbate poraigenchimode iana bate nambate dakna man·naba gnangchim ine Lillian aganskaaha.
Lillian saksa kratchagipa me·chik ong·genchimoba git ring·na sapgipa ong·e, dingtang dingtang program-rangoba bak ra·aha. Ua ki·tap poraina namnikgipa me·chikba ong·e pangnan novel aro golpo donggipa ki·taprangko poraironga ine Lillian aganaha.
An·tangni porikkana tarisamsoanirangko janapatengon, ua porikkana chu·gimik syllabus-kon poraiaha aro salo kontabri ka·e porairongaha ine Lillian parakataha.
Ua da·o Tura Don Bosco College-o Science stream-ko ra·e poraiangskana miksongenga ineba Lillian aganaha.
An·tangni chonbatgiparangna ku·pattianiko on·atengon, skatang somoirangko re·ataijachina aro pangnan poraiako ranta ka·jringchina Lillian didiataha.
HSSLC Arts-ni Top 10-o gnigipa biapko man·e chu·sokanggipa Tura Don Bosco College-ni chatri Tanisha Das-ba an·tangni chu·sokgipa ong·anina an·tangni tuition skigipa, an·tangni ma·a paa aro an·tangni abitanggipako mittelpilataha.
2022 bilsini SSLC porikkaoba Tanisha Das, Sherwood School-oni see Top 20-oni 19-gipa biapko man·e chu·sokgipa ong·ahachim indiba ia bilsini HSSLC Arts porikkaode ua Top 10-ni gnigipa biapon chu·sokgipa ong·skana man·aha.
Tanisha-ni aganani gitade, ua salantian baditaba kontarangna porairongahani a·selsa ia porikkaoba Top 10-ni gnigipa biapko man·e chu·sokna man·aha.
Mikkangchi ua Lawyer-ni kamko ka·na miksongenga ine talataniko on·angengon, adita salrangna skangmangmang ua Common University Entrance Test (CUET)-ko seaha aro chu·sokgipa ong·genchimode Delhi University-o poraianggen ine Tanisha parakataha.