SHILLONG: An·tangni jako ra·enggipa department-rango banoba tangka paisa jakkalsretani donga ine nikgenchimode FIR ka·china ine Budbar salo a·dokni Deputy Chief Minister aro NPP-ni state president Prestone Tynsong ra·biataha.
Meghalaya sorkarini tangka paisa jakkalsretanirangko ma·mong sorkariona ra·anggen ine a·doko tangka paisa jakkalsretanirangko sandirokna gita CBI aro ED-ko watatjaengani gimin VPP-ni president Ardent Miller Basaiawmoit-ni ma·mong sorkariko sing·doangani ja·man Tynsong, ia kattarangko aganaha.
Tangka paisa jakkalsretanirang donga ong·ode CBI ba ED-chi sandirokna man·aigen ine janapatengon, “Anga, Conrad, Sniawbhalang aro gipin minister-rang tangka cha·enga ine mitam manderang chanchienga. Indiba anga a·dokni namgninasa dangdike on·na an·tangko on·kangaha aro anga an·tangni dormahakon man·enga ong·ode maini gimin tangka paisarangko cha·na nanggen?” ine Tynsong sing·doataha.
Uni department-rango banoba tangka paisa jakkalsretanirang donga ine nikgenchimode jeba FIR ka·china aro kacharian iako jako ra·aigen ineba Tynsong aganaha.
Bilsi 40 batpile Purno Sangma sagini nokdango Tura Lok Sabha seat-ko rim·kepani bon·ahani gimin sing·on, politics-ode darangni gam-jinrangba dongja ine Deputy Chief Minister parakataha.
Ia Lok Sabha election-o amchepako man·ahani gimin MLA-ni pilak dilgiparangkon wate on·china VPP-ni agangipani bidingo sing·skaon, a·songni jakgitelaniko man·chengaonin ua changsaba election-o amako man·ani ja·man sorkarirangni wate on·anikode nika dongkuja ine Tynsong aganaha.
“VPP-ni iandakgipa kattarangko agananiara namen chanchina changgijaniko mesokani ong·a,” ine ua aganaha.
Ia election-o amako man·ani bidingo bakan NPP-ni dilgiparang tom·enba nipilanggen ineba Tynsong parakataha.
 |
ReplyForward
|