New Delhi: (IANS) Narendra Modi, gittamgipa changna Indiani Prime Minister-na mijalo ku·mikchetangaha, jean nangrime riknasienggipa NDA sorkariko skotong ong·e re·dilanggen.
India-ni President Droupadi Murmu, mijalo Rashtrapati Bhavan, New Delhio, Narendra Modi-ko Prime Minister-na ku·mikchetataha, je programo songsul a·songrangni dilgiparang, political dilgiparang, toromni dilgiparang ugita gipinrang bakko ra·angaha.
Indake Prime Minister Narendra Modi-ni ku·mikchetani somoio Bangladesh-ni Prime Minister Sheikh Hasina, Nepal-ni Prime Minister Pushpa Kumar Dahal ‘Prachanda’, Sri Lankani President Ranil Wickremesinghe, Maldives-ni President Mohamed Muizzu, Mauritius PM Pravind Kumar Jugnauth, Bhutan PM Tshering Tobgay, Seychelles Vice-President Ahmed Afif, gitcham President Ram Nath Kovind, niksenggipa BJP dilgipa Murli Manohar Joshi, uandake bang·a gipinrangba dongpaaha.
Robibar attamo, a·songni Prime Minister Narendra Modi baksa ku·mikchetanggipa gipin cabinet minister-rangara, Rajnath Singh, Amit Shah, Nitin Gadkari, JP Nadda, Shivraj Singh Chouhan, Nirmala Sitharaman, Dr S Jaishankar, Manohar Lal Khattar, HD Kumaraswamy, Piyush Goyal, Dharmendra Pradhan, Jitan Ram Manjhi, Rajiv Ranjan (Lalan) Singh, Sarbananda Sonowal, Kinjarapu Ram Mohan Naidu, Dr. Virendra Kumar, Jual Oram, Pralhad Joshi, Ashwini Vaishnaw, Giriraj Singh, Jyotiraditya Scindia, Bhupendra Yadav, Gajendra Singh Shekhawat, Annapurna Devi, Kiren Rijiju, Mansukh Mandaviya, Hardeep Singh Puri, GK Reddy, Chirag Paswan aro CR Patil ong·a.
Ia Union Cabinet Minister-rangna agreba MP sakbongako Independent Charge baksana Minister of State (MoS) aro sak 36 MP-rangko MoS ong·e ku·mikchetataha.
Ia 2024 bilsini Lok Sabha election-o gimik dam 543 seat-rangoni dam 293 seat-rangko cheenba National Democratic Alliance (NDA) sorkariko rikpiltaina man·aha aro uandaken Narendra Modi, NDA-ni dilgipa ong·e da·o gittamgipa changna joljol a·songni Prime Minister ong·e ku·mikchetangaha.