SHILLONG: Meghalaya a·dokni State Reservation Policy (SRP)-ko taridapjachina aro skango gitan donaichina didienba All India Garo Union (AIGU), Expert Committee-na sedoataha.
SRP-ko nipiltaiani bidingo agan-ku·pattianirangko aro an·tangtangni chanchianirangko on·china gita June 15 tarikona kingking Expert Committee, a·dokni dingtang dingtang dolrangna aro a·doko songdongenggipa manderangna cholko on·angahachim ine nikna man·a.
Iani bidingo SRP-ni expert committee-na sedoatengon, SRP-ko taridapaniara A·chikrangko gisik saatani gita ong·gen ine 1972 bilsini Reservation Policy-ko dangtapjachina AIGU didiataha.
Da·o dipet a·dokni SRP-ko Khasi-Jaintiarangna 40 percent, Garorangna 40 percent, general category-na 15 percent aro gipin jatrangna 5 percent-ko kange donahachim ine nikna man·a.
Indake ong·engon, a·dokni SRP-ko nipilani ba taridapaniara A·chikrangko gisik saatani ong·gen aro iani a·sel a·doko so·sojengjeng ong·ani cholrangba donga ine AIGU mikrakataniko on·angaha.
“Da·o dongenggipa reservation policy-ko taridapna nanggenchimode ian A·chikrangko gisik saatani ong·gen aro ian Meghalaya a·dok gimiknan nama ong·jawa. Iani a·selan so·sojengjeng ong·ani cholrangba donga, uni gimin pilakni namgninan SRP-ko skango gitan donaiode nambatgipa ong·gen,” ine AIGU-ni president Elbarth Marak parakataha.
1972 bilsio tarie on·gipa reservation policy-ara pilak jatni namgninan chanchie tarigipasa ong·ani gimin iakon ja·rikangkuna nanga ineba AIGU-ni president parakataha.
1972 bilsini State Reservation Policy-kon ja·rikangkuna nanga ine janapatengon, badiaba political dolrangsa an·tangtangni man·gnina ia SRP-ko nipiltaichina dabitokenga indiba ian a·doko so·sojengjeng ong·aniko ra·bana sienggipa kam gitasan ong·aia ine AIGU-ni president parakataha.