TURA: West Garo Hills a·jani Dadenggre jolo donggipa Lower Teksragre songo, me·chik saksako baditaba sak me·asarangni ka·saninggija dake dokako social media-rango niksona man·ani ja·man police-rang, dos dakgipa manderangko rim·na man·aha.
Social media-rango giproroenggipa video-oniko niksona man·ani gitade, me·chik saksako badiaba maharini me·asarang, jinma kni salenba kragija dake gol·dikrangchi dokahachim. Ia manderangoni saksade ia me·chikko ga·tingaba ga·tingengachim.
Ia me·chikko dokengmiting somoio sambao donggipa manderangba una dakchakani pal, jinma niesa dongskaaiahachim.
Uko dokengmiting somoio me·aparangoni saksade iandake uko dokjachina beng·ahachim indiba ia me·chikko dokgipa manderang uni beng·ako manigija dokangkuaiaha aro sambao donggipa me·chikrangba uko dokkuchina gitasa aganskatokahachim.
Iandake me·chik saksako ka·saninggija dake jinma dokaniko niksoe bang·a manderang suk ong·gijaniko parakattokahachim.
Indake ong·engon, ia a·sel ong·ani video-ko niksoani ja·man West Garo Hills a·jani police-rang, ta·raken dos dakgipa manderangko am·sandina a·bachengaha aro dos dakgipa manderang gimikkon rim·na man·aha ine West Garo Hills a·jani Superintendent of Police (SP) Abraham T Sangma parakataha.
“Ia a·sel ong·chakgipa biapko chingni sipai dolrang, am·sandina a·bachengaha aro video-oniko nikenba chingni sipairang, Damal Asim-ona re·angon songni manderang ia a·selni bidingo chingni sipairangna talate on·na man·aha,” ine SP aganaha.
SP-ni parakatani gitade, dos dakgipa manderangoni sakgnikode police-rang, ua songonikon rim·na man·aha indiba gipin sakgittam manderangde Budbar walo, Jengjal police station-ona re·bae an·tangtangko bame on·eaha.
Bame on·egipa sakgittam manderangkoba ja·mano Tura police station-ona rimbaaha.
Doka man·gipa me·chikko ja·man medical check up-na rimangaha aro ia a·selni bidingo Tura Women’s Police Station-o mokordoma ka·aha ineba SP parakataha.
Ia video-ko watpriprae rojachina aro kimite galchina gitaba Police-rang pilakkon didiataha.