TURA: East Garo Hills a·jani Sonja Wildlife Rescue Centre-o donenggipa hurorangko gipin biaprangona apjitangjachina gita didie Sombar salo, Tura Garo Senior Citizens Forum (TGSCF), New Tura Development Forum (NTDF), Garo Hills Environment Protection Society (GHEPS) aro Garo Graduates Union (GGU), a·dokni Chief Minister Conrad K Sangma-na sedoataha.
Ia centre-o donenggipa hurorangko Ri Bhoi a·jani Umtrew songo gital kulienggipa state zoo baksana Guwahati aro Lucknow zoo-rangona Forest & Environment department, apjitangna miksongenga ine kobor man·soani ja·man ia hurorangko gipin biaprangona apjitangjachina gita NGO-rang, a·dokni Chief Minister-ko didiataha.
Sonja Wildlife Rescue Centre-o donenggipa hurorangko gipin biaprangona apjitangna manchienganiko jegalatengon, ia hurorangko gipin biaprangona apjitangna manchianiko ra·pilchina gitaba NGO-rang, a·dokni Chief Minister-ko didiataha.
NGO-rangni parakatani gitade, ia rescue centre-ko kuligipa song Silsotchigre songni manderangba ia biapni hurorangko gipin biaprangona apjitatani pal, ia apsan biapon sorkarini dakchakanichi breeding centre-ko kulichinasa nangniktokengachim.
Hurorangara A·chikrangni dal·e ra·gipa matburingsa ong·a ine janapatengon, ia hurorangko uamangni dongchakgipa biaprangoniko gipin biaprangona apjitanganiara ding·a sin·anioba hurorangna melijanaba gnang ine dingtang dingtang dolrangni pal, TGSCF-ni general secretary LC Momin parakataha.
2023 bilsio ia rescue centre-ko mikka balwa ta·rakanichi nosto ka·ani somoio huro mangsa ia biaponi joke kataha ine gisik ra·atpilaniko on·angskaengon, “Ia centre-o matburingrangko nambate nirok sandina gitasa sorkari gisik on·na nangenga,” ine TGSCF-ni general secretary parakataha.
Apsan daken, A·chik Conscious Holistically Integrated Krima (ACHIK) dolba, iandake Garo Hills-ni hurorangko gipin biaprangona apjitangna sorkarini manchienganiko raken jegalataha aro Garo Hills-ni matburingrangko gipin biaprangona apjitangani pal Garo Hills-on Zoo damsako kulichina a·dok sorkariko didiataha.