SHILLONG: Meghalaya Legislative Assembly-o Anti-Defection Law dongani gimin gitcham dilgiparangko Congress-ona re·bapilchina okamgenchimoba re·bapilna man·jawaha ine Sombar salo, TMC-ni state president Charles Pyngrope parakataha.
Robibar salosan, TMC-ni dilgipa aro a·dokni gitcham chief minister Mukul Sangma-ko man·chape gitcham dilgiparang jeba Congress dolna kamko ka·na sikenga ong·ode re·bapilna man·aigen ine Congress Legislature Party (CLP)-ni dilgipa Ronnie V Lyngdoh aganahachim.
Uni iandake okamani kattarangna aganchakaniko on·angskaengon, MLA ong·gijagipa gitcham dilgiparangde je somoioba re·angpilna man·aigen indiba MLA ong·enggipa gitcham dilgiparangde Congress-ona re·angpilna niam dongjaha ine Pyngrope parakataha.
“Anti defection law dongani gimin MLA-rangde gitcham party-ona re·angpilna man·jawaha,” ine ua aganaha.
TMC-ni sakbri ba sakbonga MLA-rang gitcham party-ona re·angpilna tik ka·a ong·ode uade dingtang obostao ga·akskagen ineba Pyngrope aganaha.
AICC-oni uko okamatpilgenchimode ua Congress-ona re·angpilgenma ine sing·anina aganchakaniko on·angengon, da·o dipet ua an·tangde Congress-ona re·angpilna skanirang dongja ine TMC-ni state president parakataha.
TMC-ni dilgipa aro a·dokni gitcham chief minister Conrad K Sangma-ko man·chape pilaknan Congress dolni do·gako oe donenga ine Robibar salo, Opposition dolni dilgipa aro Congress Parliamentary Party-ni dilgipa Ronnie V Lyngdoh parakatahachim.
“Chinga darangkoba biming mingtee okamna nangnikjaenga indiba Congress dolde pangnan gimikkon rimchakna kusi ong·aia. Chinga iani saksa ba sakgni dilgiparangkosan okamenga ong·ja indiba na·simang, party-ni miksonganirang gita kamko ka·na nangnikenga ong·ode na·simangna Congress dolni do·gako pangnan oe donaienga,” ine Lyngdoh aganahachim.
Mukul aro uni manderangko Saleng-ni nokchakjana gita agangipani bidingo sing·on, “Ukode na·simang MP-osa sing·aiboha maina chinga party-ni gitade iani bidingo chanchirima dongkuja. Congress dolona pilakkon okamenga ine aganon chinga badiaba mandeko ba dilgipako miksonge aganenga ong·ja,” ine Lyngdoh aganaha.