SHILLONG: Trinamool Congress (TMC)-o napanggipa Congress dolni gitcham dilgiparang, gitcham party-ona re·angpilna miksonganirang donga ine chanchichipe agananirangko knana man·engon, iandake agananiko Meghalaya TMC-ni president Charles Pyngrope jegalatenba, a·doko TMC-ni MLA-rang Congress dolona re·angpilna miksonganirang dongja ine talataniko on·angaha.
Congress dolona re·angpilna gita adita salrangna skang TMC-ni dilgiparang, saksa dilgipani noko tom·e chanchirimangaha ine agananikoba ua raken jegalataha aro ua an·tangde iandakgipa tom·anirangko ong·atani bidingo ma·sia dongja ine Pyngrope parakataha.
Da·o dipet ua TMC-ni president ong·e, gipin dolrango napchina gita aganeanirangko man·soa dongkuja ineba ua aganaha.
Meghalaya a·doko TMC-ko napsrimgimin jahas ine matnanganirangna aganchakaniko on·angengon, “Chinga bon·aha ong·ja aro chinga tangchapilaigen. Ian rakgipa kam ong·naba gnang indiba chinga bilakbapiltaina krenge kamko ka·enga,” ine TMC-ni state president parakataha.
Mikkangchi ong·atna sienggipa election-rango bang·bate vote-rangko man·na gita uamang TMC-ko a·doko dal·batatna jotton ka·enga ineba Pyngrope aganaha.
Da·o ong·atna sienggipa Gambegre by-election-ni gimin janapatskaengon, ia by-election-o candidate-ko susaatani bidingo uamang chanchina nangenga ine ua aganaha.
Assembly-o Opposition-ni dilgipana dabienggipani bidingo janapatskaengon, “Assembly-o bak 10-oni baksa ong·jagenchimode Speaker-ni kosako niamrangko ra·gatna man·jawa aro ua an·tangni skani gita jekoba dakna bil donga,” ine TMC-ni state president aganaha.
