SHILLONG: Re·anggipa April jao ong·atanggipa Lok Sabha election-o BJP-ni dakchakanichi susae NPP amako man·ani ja·man dolgnini gisepo adita meligrikgijanirangko nikna man·ahani gimin da·o ong·atna sienggipa Gambegre Assembly constituency-ni by-election-ode dolgnian, doltangari susaskana tik ka·angaha.
Iani bidingo kobor ra·timgiparangna talataniko on·angengon, Gambegre by-election-o susana gita ua ma·mongni dilgiparangna u·iatmanaha aro BJP-ni high command-ba by-election-o susaaniko namnikpaaha ine BJP-ni state president Rikman G Momin parakataha.
Gambegre by-election-o NPP baksa nangrime susajaengani gimin sing·on, Lok Sabha election-namangmangsan uamang NPP baksa bakrimaha indiba Assembly aro District Council election-rangode doltangari susaaigen ine Momin parakataha.
Gambegre by-election-o BJP, darangmingba bakrimgija susaaigen ine talataniko on·angskaengon, Lok Sabha election-o BJP-ni bakrimaniko on·ani a·selsa NPP amako man·aha ine agananikoba jegalataha aro by-election-o BJP-na NPP-ni bakrimaniko nangja ine Momin parakataha.
NDA-o bakrimenggipa dolrangna chakpaaniko on·china gita a·songni Prime Minister Narendra Modi aganahani giminsa Lok Sabha election-o BJP, NPP-na chakpaaniko on·aha ine janapatskaengon, Gambegre by-election-o susana gita BJP-ni tikitko Bernard Marak-nan on·ani cholrang dongbatenga ine BJP-ni state president parakataha.
Gambegre by-election-o susana gita ua BJP-ni tikitna krengenga aro ua tikiko man·na nanga ine BJP-ni state vice president aro Tura-ni MDC Bernard N Marak-ba aganahachim.
Da·o dipet Gambegre by-election-o susana gita kamrangko ka·a dongkujaenga ine janapatengon, indita bilsirangna Gambegre constituency-o maming namroro silroroaniko nikna man·kujaenga ine BJP-ni state president parakataha.
Gambegre-ni gitcham MLA-ra Independent MLA-sa ong·ani gimin uko matnangna man·jawa ineba ua aganaha.
Meghalaya a·dokni BJP dol, Gambegre by-election-o susana nangnikenga ine ma·mongni dilgiparangna u·iatmanaha ine BJP-ni state spokesperson M Kharkrang-ba parakataha.