NGH-o JJM project-na maram cha·gipa pipe-ko jakkala

TURA: North Garo Hills-ni Menadoba songni Nokma aro songni manderang, jolni local body-ni president, secretary-rang, uamangni songo JJM project-na maram cha·gipa pipe-rangko jakkala ine Kharkutta Sub-Division PHE-ni SDO-na badi ka·a.
Iana skangba songni manderang PHE-ni Junior Engineer-na badi ka·ahachim aro gitcham maram cha·gipa pipe-rangko project-na jakkaljachina aganahachim. Indiba maming ja·ku de·jaha. Uni gimin songni manderang apsan tom·dake chanchirima ja·man SDO-na badi ka·na tik ka·aha.
“JJM project-na jakkalgipa maram cha·gipa silni pipe-rang ru·uta somoina baikamjawa. Sawamancha ba badia contractor, sub-contractor-an ia project-ko jako ra·aha iakoba chinga u·ija. Contractor, songni manderang baksa changsaba agangrika dongja unbaksana project-ni kamko nirokeaba dongja. Mandekon changsaba nika dongkuja ine songni manderang, uamangni badi ka·anio janapaha.
Songni manderang, man·a nanggniko man·jaenga, uni gimin songni manderang official-ko ia mamlako nirokatchina mol·molaha. Aro ta·raken maram ka·gipa pipe-rangko galskae namgipa aro gital pipe-rangko jakkalchina dabiaha.