NH-6 ramako namdapatchina NHAI-na ge·etaniko on·a

SHILLONG: East Jaintia Hills a·jao National Highway (NH-6) rama namsrangjaengahani a·sel ramako re·ruraenggipa manderang neng·nikanirangko chagrongna nangtokengani gimin ia ramako namdapatchina gita East Jaintia Hills a·jani District Administration, National Highway Authority of India (NHAI)-na ge·etaniko on·ataha.

Ia ramako Sombar salo, MLA Santa Mary Shylla baksana East Jaintia Hills a·jani Deputy Commissioner, Police official-rang, Project Director, NHAI, ADC-rang aro dingtang dingtang official-rang re·ange niangaha.

Mikkarang dontonggija waengani a·sel ia NH-6 rama namjabatroroataniko man·engahani gimin ia ramani a·a ruronggipa biaprango, mongsongbate Lumshnong, Sonapur, Kuliang aro uandakgipa biaprango, be·e dongenggipa a·arangko rongtalatna aro garirangni jachange dongako chel·chakna man·na gita ia ramarango JCB aro excavator gita dakgipa kolrangko bang·bate jakkalchina NHAI-na ge·etaniko on·angaha.

A·kolrara dakgipa ramarangko gapatchina, ramarango nalarangko tarichina aro ramao chi sikkonganiko chel·chakna gita ramani sambarango culvert-rangko tarichina gitaba NHAI-ni official-rangko ge·etangaha.

Indake ong·engon, mongsonggipa rama tarianikode mikkarang namangahaosa a·bachengna man·gen ine NHAI-ni official-rang, da·o dipet manderangni neng·nikanirangko namatna ia ramarangko tarichenge on·na ku·rachake ra·angaha.