Gital MCS officer-rangna a·dokni Governor ku·pattianirangko on·a

SHILLONG: Meghalaya a·doko nominate ka·a man·gipa gital Meghalaya Civil Service (MCS) officer-rangko Sukrobar salo, a·dokni Governor CH Vijayashankar grongenba, dingtang dingtang kamrang, mongsongbate lekka pora, an·seng baljokani aro samtangtango ong·telaigiparangko ripinganio gisik on·bate kam ka·china agan-ku·pattianirangko on·angaha.
Adita salrangna skangsan a·dokni dingtang dingtang officer-rangko MCS officer-ni gadangona ra·doatenba, ia officer-rangko assistant commissioner-ni kamo donatahachim. Ia officer-rang Sukrobar salo, a·dokni Governor-ko grongetokaha.
Nominate ka·a man·gipa officer-rang baksa agangrikengon, Meghalaya a·doko maikai mandeko sanna man·gipa sam-bolrang donga, uarangna a·dokni Governor mittelpile aganangaha.
Ia gital MCS officer-rangna an·tangni namgipa skanirangko on·angengon, a·dokni namroro silroroanina an·tangtangko on·kange aro ka·oksiani gnang kam ka·china gitaba Governor didiangaha.
Nominate ka·a man·gipa sakdok MCS officer-rangara, Tura-ni District Employment Exchange office-o Employment Officer ong·e kamko ka·anggipa Julius R Marak, Meghalaya Police-o Sub Inspector (UB) ong·e kamko ka·anggipa Nylla E Wanniang, Sohra-o Border Areas Development Officer ong·e kam ka·anggipa Anthony Lyngdoh, Zikzak ICDS-o Child Development Project Officer ong·e kam ka·anggipa Torali K Marak, Jowai-ni Jaintia Hills Territorial Division-o Forest Ranger ong·e kam ka·anggipa Freddy Passah aro Baghmara-ni District Commerce & Industries Centre-o Project Manager ong·e kam ka·anggipa Chengreng D Sangma ong·a.