SHILLONG: Meghalaya a·dokni Ri Bhoi, East Khasi Hills aro Jaintia Hills-ni damgni a·jarang gita ma·mong sorkari, High Speed Corridor-ko tarina miksongengoba, ia a·jarango donggipa mitam songni manderang a·arangko on·na jechaktokengani gimin neng·nikanirangko chagrongna nangenga.
Ia project-na National Highways & Infrastructure Development Corporation Limited (NHIDCL)-ni gita survey-ko ka·engahaoba dam 4 ba dam bonga songni manderangde a·arangko on·na jechaktokskaengachim.
NHIDCL-oni kobor on·ani gitade, ia ramana Diengpasoh songni manderangde a·ako on·na jechaktokaha aro West Jaintia Hills a·jani Mawkyndor, Lad Mukhla aro Mukhla Mission songrango donggipa manderangde ia ramako dingtang biap gita tariskachina nangnikskaenga.
“NHIDCL-ni official-rang, dingtang dingtang a·jani deputy commissioner-rang baksa agangrikjringenga aro deputy commissioner-rangba, ia project-na a·arangko on·china songni manderangko didiskaenga,” ine kobor on·timgiparang parakataha.
Ia High Speed Corridor ba ramako gong kror hajal 20,000-na baten koros ong·e tarina siengani gimin ian Meghalaya a·dokna dingtanganiko ra·baani chol ong·engachim.
Ramako dingtang biap gita NHIDCL tarina man·jawaha aro badiaba biapko dingtangatna nanggenchimode ia ramani bang·bata bakrangon nangchakeaniko man·gnok ine janapatskaengon, ia project-na da·o DPR-ko tariengaha ine official-rang parakataha.
Sorkari a·arangko on·genchim ong·ode ia bilsini gisepon NHIDCL, dal·begipa project-ko jako ra·na sienga ineba official-rang parakataha.
Ia high speed corridor-ko Umiam-oni a·bachenge, Shillong Bypass, Mawryngkneng, Ratacherra gita bon·kamao Assam a·dokni Cachar a·jao donggipa Panchgram-o bon·atena siengachim aro ia ramani bakroaniara kilometre 160-mang ong·engachim.
 |
ReplyForward
|