TURA: Tura Civil Hospital-o kam ka·giparang chu·ongjaengani a·sel sanna bananirangko on·anio neng·nikanirangko chagrongna nangenga ine A·chik Conscious Holistically Integrated Krima (ACHIK) parakatenba, ia hospital-na chu·onga gita kam ka·giparangko donatchina a·dokni Health Minister-ko didiataha.
Tura Civil Hospital-na anaesthetist-ko donatchina didiatengon, ia hospital-o anaesthetist-rang chu·onga gita dongjani a·sel surgery-ko dakna nangenggipa manderang bang·a changon ru·uta somoirangna senge dongna nangronga aro mitamrangde chel·a biaprangonasa re·ange surgery-rangko dakna nangenga ine ACHIK Krima Council-ni dilgiparang parakatenba, Tura Civil Hospital-na chu·onga gita anaesthetist-rangkoba donatchina a·dokni Health Minister-ko didiataha.
Medical Laboratory Technician aro Technologist-rangko songani bidingo janapatskaengon, “Tura Civil Hospital-o A·chik ong·gijagipa lab technician aro technologist-rangko ra·na chanchirimanirang donga ine chinga knasona man·aha. Chinga dingtang dingtang jatni medical professional-rangko mande ra·ja ong·ja indiba Garo Hills-o iandakgipa kamrangna jattangko ba joltangni manderangko ra·na man·ode nambata maina A·chikrangsa songtangni daka rikani aro ku·agananirangkode nambate ma·sia. Jattangni ba joltangni manderangko kamo ra·genchimode sagiparang baksa agangrikanirangoba neng·nikanirangko man·jawa aro ian joltangni manderangna kamrangko ka·e cha·na cholko on·ani gitaba ong·gen,” ine ACHIK Krima Council-ni dilgiparang parakataha.