TURA: West Garo Hills a·jani a·kawe jolo donggipa Anti Corruption Foundation of India (ACFI)-ni membor-rangko, dingtang dingtang bading chiwalgipa manderangoniko tangka dabie ra·a ine matnangenba, police-rang rim·aha.
Ja·manchake koborko man·soani gitade, bading chiwalgiparangoniko tangka dabie ra·ahani gimin ACFI-ni membor sakgniko police-rang rim·na man·aha indiba saksade kate dongkuengon, gipin membor-rangnaba police-rang u·iatanirangko on·manaha.
ACFI-ni membor-rang, Rajabala police station-ni ning·o bading chiwale cha·enggiparangoniko tangka dabienga aro ka·mikkenatanirangko on·enga ine sak 30 manderang, changgni dake FIR ka·ani ja·man police-rang, ACFI-ni membor-rangko rim·aha.
Ia manderangni FIR-o parakani gitade, ACFI Rajabala unit-ni membor-rang, chong·motan Abdur Rup Choudhury, Salim Islam, Azadul Islam aro gipin membor-rang, donation gilenga inmika dake, bading chiwalgiparangoniko tangka dabirongachim aro tangka paisarangko on·jagenchimode ka·mikkenatanirangkoba dakrongachim.
Ia ACFI-ni membor-rang, niam gri ba licence gri chalaienggipa teer counter-rangkoba ka·mikkenate, jaantian tangka paisarangko gile ra·engachim ineba FIR-o parakaha.
FIR-ko man·soani ja·man police-rang, ia manderangni bidingo am·sandianirangko dakna a·bachengaha aro uandaken president Abdur Rup-ko Rajabala-oniko aro skanggipa kate donggipa Azadul Islam-koba Assam-ni Mankachar jolo donggipa Kasaripara songoniko rim·na man·aha. FIR-o matnangako man·gipa Salim Islam-de da·o dipet police-rangoni kate dongkuenga aro ukoba rim·na gita police-rang u·iataniko on·manaha.
Ia ACFI dolara, a·songo tangka paisa jakkalsretaniko champengna bikotgipa dolsa ong·a ine songbadrango a·kanganirangko nikna man·achim.