SHILLONG: Gipin party-ona napanggiparangoni bang·an gitchambatgipa party-ona re·bapiltai, ian gitcham Minister aro MLA-chi a·bachenggen. October 11 aro 12 tarikonide bang·arangko re·bapilaniko nikna man·gnok ine state Congress aganaha.
“Beben bang·a MLA-rang party-oni ong·katangaha, iako jechakja, indiba da·ode bang·an party-ona re·bapilna siktokenga iako jechakna man·jawa,” ine MPCC Chief, Vincent H Pala aganaha.
October 11 aro 12 tariko South West Khasi Hills-o tom·gen, ua tom·anio adita sakrangde party-o napgen ine parakaha indiba chu·gimik talataniko on·na jechakaha.
Beben party-ona re·bapilna gita uamang resign ka·kuja indiba uamang party-ona re·batelgen. Congress worker-rang jemangan chingko watahachim uamang da·ode re·bapilnasienga. Uamang party-o naptaion manderang party-o ka·dongtaignok, uni gimin chinga kamrangko ta·rake ka·gija ka·sinsin ka·enga. Gitcham MLA aro gitcham Minister re·bapilenga.
Uandake uni MPCC chief ong·e dilani gimin sing·aon Pala indine aganchakaha, “Sak 12 MLA-rang Congress-oni ong·kate TMC-o napangaha. Da·o uamangko niatgenchimode uamangoni badita sak TMC-o dongkuenga nie nibo. Mitamrang UDP, NPP aro gipin party-rango napaha. Party-oni ong·kata somoio uamang angko matnangaha, angni a·sel party-oni ong·kata ine aganaha. Indiba da·ode uamang TMC-ko sani gimin aro sana watskaha? Mitamrang gipin party-rango napaha. Niatna gita saksa MLA-an bilsisani gisepo party ge·gittamo napaha, uana sako matnangskagen, ine Pala sing·doaha.”
MLA-ni party-ona re·bapilani gimin aganatengon Pala, indine agankuaha, “kakketko agangenchimode uamang Congress-ko bilakgipa opposition dake ra·enga aro Congress, political-na ong·ja manderangni namgninasa kam ka·a. Beben changsade majoanirangko man·aia indiba chinga an·tangni ideology ba chanchibewalaniko gimata ong·ode chinga politics-o gimikkon gimaata.”
“Anga an·tangko nama ine agana man·ja, aro anga President ong·na sika ineba ong·ja indiba AICC-ni angko nangnikani giminsa anga iano dongenga. Anga election-o sirikgenchimoba chinga bang·bate vote share-ko man·aha, ine Pala agandapaha.”
