WILLIAMNAGAR: Art & Culture Department-ni ning·o donggipa Umbrella Project-ni Chapter III Simsanggre-ni ning·o dingtangmancha Art & Culture Workshop-ko September 23 tarikoni September 27 tarikona, Williamnagar-ni Loyola College-o ong·atenga aro ia workshop-ko Sombar salo, a·dokni PHE Minister Marcuise N Marak a·bachengate on·angaha.
Ia workshop-ko a·bachengate on·anganio a·dokni PHE Minister aro Williamnagar-ni MLA Marcuise Marak, jinmana aganprakengon, chadamberangko dakchakna gita sorkarini ra·gate on·gipa dingtang dingtang program-rangni bidingo talate on·angenba, ia project-ara chadamberangni dingtang dingtang changa sapanirangko mesokna nambegipa chol ong·a ine parakangaha.
Ia workshop-ara chadamberangna dingtang dingtang ostrorangko on·na miksonge ong·atenggipa program ong·a ine janapatengon, chadamberangko bading chiwale cha·giparang ong·china gita Marak didiangaha.
Ia workshop-ko a·bachengatanio, East Garo Hills a·jani Deputy Commissioner Vibhor Aggarwal-ba dongpae jinmana aganprakangengon, jatni daka rikaniko ripinganide pilakni daitoan ong·a ine an·tangtangni changa sapanirangko ma·sie ra·na gita ia workshop-o gisik nange skie ra·china chadamberangko didiangaha.
Ia workshop-ko ong·atanio, jawilwat tariani, golpo seani, drama dakani, jatni doka dam·ani aro uandakgipa jakni kamrangko skie on·anggen.
Ia workshop-ko a·bachengatanio, a·dokni PHE Minister, ia bilsini HSSLC porikkao topper ong·gipa East Garo Hills a·jani chatro chatrirangna Tablet PC-rangko suale on·angjolaha.
Ia tom·anio dongpae jinmana aganprakanggipa gipin manderangara, A·chikrangoni jawilwat tarianina mingsing minggamako man·gipa Dominic M Sangma, Loyola College-ni principal, District Librarian Suzeanna Marak aro gipinrang ong·a.
Ja·mano a·dokni PHE Minister, Williamnagar-ni Dawa Chipitgre gittimo honey processing centre-koba nokdonggae on·angjolaha.
