TURA: 2005 bilsini September 30 tariko a·sel ong·ani mijal Sombar salo bilsi 19 gapahaon, ia salo sianggipa sak 9 manderangko gisik ra·na gita dingtangmancha Garo Hills-o tom·aniko ong·atangaha.
September-ni 30 tariko Police-rangni goanichi so·ota man·gipa sak 9 manderangko gisik ra·na gita Tura-ni District Auditorium-o dingtangmancha tom·aniko ong·atangaha.
Bilsi 19-na skang, MBOSE-ni headquarter-ko a·dok sorkarini Shillong-ona apjitangna jotton ka·aniko manderangni jegaltokengmiting somoio Tura aro Williamnagar biap damgnion, jegalenggipa manderangko Police-rangni skatang goani a·sel Tura-o sak 4 aro Williamnagar-o sak 5 manderang so·otako man·ahachim. Ia a·sel ong·anio gimik sak 9 manderang so·otako man·angan baksana bang·bea manderang guli nangako man·e saknaanirangkoba man·tokahachim.
Ua apsan salon Baghmara-oba chatro chatrirang aro jolni manderang tom·aniko ong·atengachim indiba ua somoio rang·gitik mikkarang jimbee waahani a·sel manderang noktangtangona re·angpiltokna gita nangaiaha aro uandaken Baghmara-o iandake a·sel ong·aniko chagrongna gita nangjahachim.
Indake ong·engon, Sombar salo ia salko gisik ra·na gita dingtangmancha Tura-o tom·bimonganiko 30th September Victims Solidarity Forum-ni gita District Auditorium-o ong·atangaha aro ia tom·anio dingtang dingtang NGO-rang, chatro chatrirang aro ua salo sianggipa manderangni nokdangrangba dongpae bakko ra·angaha.
Ia tom·bimonganiko ong·atanio, Garo Hills Sentinel for Human Rights-ni gitcham president Sengrak D Marak, mongsonggipa sokgipa ong·e bak ra·angaha aro tom·anio ua jinmana aganprakangengon, bilsi 19-na skang ong·anggipa a·selni bidingo agan-talatanirangko on·angenba, unsalo an·tangtangni janggirangko gimaatna nanggipa manderangna mande ra·pilskaanikoba dakangjolaha.
Ia tom·bimonganio dongpae jinmana aganprakanggipa gipin manderangara, 30th Sept Victims Solidarity Forum-ni chairman Manseng A Sangma, 30th Sept VSF-ni general secretary Waldheim D Sangma aro gipinrang ong·a.
District Auditorium-o program matchotani ja·man, Tura Chandmary kal·chakramo tarie donenggipa cenotaph-ona jinma re·angenba, unsalo so·ota man·gipa manderangko gisik ra·na ua biapo mombatirangko so·angtokaha.
