TURA: 2023 bilsini Assembly election-na campaign ka·engmiting somoio bilona re·bapiltaina man·genchimode sak lak 5 chadamberangna kamrangko on·gen ine a·dokni Chief Minister Conrad K Sangma ku·rachakaniko on·ahachim ine Tura-ni MDC Bernard N Marak parakatenba, ia ku·rachakaniko chu·sokatna gita ua mai ja·kurangko de·chakataha ine Chief Minister-ko sing·doataha.
Chief Minister-na sedoatgipa chittio Marak-ni parakatani gitade, 2023 bilsini Assembly election-na campaign ka·engmiting somoio, a·doko sorkariko rikpiltaina aro dilna gita cholko man·pilgenchimode a·dokni sak lak 5 chadamberangna kamrangko tikate on·gen ine Chief Minister Conrad Sangma ku·rachakaniko on·ahani gimin bang·a chadamberangan ka·dongani baksa NPP-na pu·ontokahachim indiba da·alo chubata gadangrango poraiani ja·manba bang·a chadamberangan kamgri ong·e dongna nangtokengani gimin chadamberangni gisepo suk ong·tokjaengachim.
“Da·alo NPP chu·gimik bil dongahani gimin Chief Minister ong·e sak lak 5 chadamberangna kamrangko on·na man·gnokchim indiba bang·a chadamberangan poraia matchoteba da·alo kamgri ong·e dongna nangtokengani a·sel ka·dongani gri ong·na nangtokengaha,” ine Marak parakataha.
Adita salrangna skang, nurse, home guard aro gipin kamrangna seokanio parake dakani dongjaha gita nika ine janapatengon, Meghalaya a·dokara Kristian a·doksa ong·ani gimin iandakgipa obostarang ong·na nangjachim ine Tura MDC parakataha.
“Kamna seokanio kamko man·na kragipa chadamberang man·china gita kakketo aro nikrangrao seokchina angade ku·pattigenchim. Ia kamrangna seokanio ong·gija dakaha ine bang·en badi ka·anirangko anga man·soaha,” ine Marak parakataha.
ASHA worker-rang, Anganwadirang, MSSAT-rang, Adhoc aro sorkari skulrango skigiparang, dingtang dingtang health centre-rango kam ka·enggiparang, dingtang dingtang department-ni Muster Roll-rang, home guard-rang aro gipinrangba an·tangtangni man·na nanganirangko sorkari on·na simsakjaenga ineba Tura MDC matnangataha.