SHILLONG: Meghalaya a·dokni East Jaintia Hills a·jao cement karkana kulidapna miksongenganiko Hynniewtrep Integrated Territorial Organisation (HITO) Narpuh circle jegalatenba, re·baenggipa October-ni 18 tariko Meghalata State Pollution Control Board (MSPCB)-ni ong·atna manchienggipa public hearing-ko ong·atjachina dabiangaha.
Koborko on·ani gitade, Meghatop Cement Pvt Ltd, East Jaintia Hills a·jani Wahiajer Narpuh-o Integrated Cement Plant-ko kulina manchiengani gimin MSPCB, jolo songdongenggipa manderang baksa agangrikna public hearing-ko October-ni 18 tariko ong·atna tik ka·ahachim.
Iani bidingo East Jaintia Hills a·jani Deputy Commissioner Shivansh Awasthi-na badi ka·e sedoatengon, gipin biaprangoni company-rang, a·doko cement karkanarangko kulienganiara mikkangchi a·dokni manderangnan gimaani ong·gen ine HITO Narpuh circle parakataha.
“Ia jolrango gipin biaprangoni manderangsa karkanarangko kuligenchimode ian joltangni manderangna gimaani ong·gen. East Jaintia Hills a·jao damchet cement karkanarang dongaha aro ian samtangtango ong·telaigiparangna aro manderangnaba nangchakeaniko ra·baenga. Ia cement karkanarango kam ka·giparangba joltangni manderangna bate gipin biaprangoni manderangsa bang·bate kamrangko ka·e cha·na chol ong·engani gimin ia jolni manderangnade maming namgnirangko on·jaenga,” ine HITO Narpuh circle-ni dilgiparang parakataha.
“Bilsirang re·angroroengon, china dilani, buring bolgrimrangni porongrong ong·ani, chi moila ong·ani, sabisi sakanchirangni batrikrikani aro ding·ani batroroaniko nikna man·enga. Iandakgipa neng·nikanirangko namatani pal Meghatop Cement Pvt Ltd-ni cement karkana kulina miksonganiko chu·sokatna official-rang, public hearing-kosa ong·atskana manchienga indiba chinga iako raken jegalenga. Ia public hearing-ko ong·atjachina chinga sorkariko didienga,” ine HITO Narpuh circle parakataha.