TURA: Re·baenggipa November jani 13 tariko ong·atenggipa 56-Gambegre (ST) Legislative Assembly Constituency-ni by-election-na Model Code of Conduct-ko ra·gatahani gimin West Garo Hills a·jani District Magistrate, dingtang dingtang niamrangko ra·gate on·angaha.
Sorkarini biaprango donggipa pakmarango seani, poster tapani aro banner kadeaniko champengna gita West Garo Hills a·jani District Magistrate, Section 144 CrPC-ko ra·gatangaha.
Manderangni nok, bagan ba garirango seachi permission-ko ra·chenggija banner kadeani ba sticker tapani aro flag kadeanikoba District Magistrate, ia niamni ning·o champengataha.
Gari nokgipa an·tangan gario flag kadena ba sticker-rangko tapna on·genchimoba uan ramao re·ruraenggipa gipin manderangna maming man·dikatani ba bringbrangatanirang ong·na nangjawa ineba District Magistrate u·iataha.
By-election-ni kamrang chu·gimik matchotsrangkujaskal, West Garo Hills a·jao silchidare ba gopretani bosturangko ra·bitna man·jawa indiba ian sipai dolrangnade nangchakeani dongjawa ineba District Magistrate u·iataha. Indake ong·genchimoba ia ge·etaniara, Police, Home Guards, Forest, BSF aro CPMF gita dakgipa sipai dolrangnade maming nangchakeani dongjawa ine District Magistrate u·iataha.