TURA: Garobadha-oni Selsella-ona dakanggipa rama namsrangjahani a·sel re·ruraenggipa aro jolo songdongenggipa pilakan neng·nikanirangko chagrongna nangtokenga ine A·chik Conscious Holistically Integrated Krima (ACHIK) dol parakatenba, ia ramako ta·raken taripile on·china PWD (Roads) North Division-ni Executive Engineer-ko didiataha.
ACHIK dolni parakatani gitade, ia Garobadha-oni Selsella-ona dakanggipa ramara ia jolrango songdongenggipa manderangnasan ong·aigija pilak biaprango songdongenggipa manderangnan aro mongsongbate bading chiwalgiparangna namen nangchongmotgipa rama ong·achim indiba da·o ia rama namsrangjahani a·sel bading chiwalani kamrangosan ong·aigija pilak kamna re·ruraenggipa manderang aro nangchongmotgipa bosturangko salruraenggipa garirangba neng·nikanirangko chagrongna nangtokengahachim.
Batanggimin sal somoirango mikkarang dontonggija waangahani a·sel ramarang re·nan namsrangjaengaha ine janapatskaengon, ian re·ruraenggipa manderangna neng·nikanisan ong·aigija mandeni jangginaba kenchakna nangani ong·enga ine ACHIK parakataha.
Indake ong·engon, ia ramako mikkangchi ru·ute baiatna gita wachini somoirango nosto ong·gijagipa bosturangchi tarina, mikkachirangko chel·chakna gita ramani paktangtango peng·anirangko donchina, ramako somoi gita nirokjringe tarichina aro ramako tarianio jolni manderang baksana agan-chanchirimchengchina gita ACHIK, PWD official-ko didiataha.
