BOKO: Assam a·doko songdongenggipa A·chikrangna Garo Development Council (GDC) songe on·na miksongengani gimin Bristibar salo, Garo Autonomous Demand Committee (GACDC)-ni tom·bimonganiko Dudhnoi jolo donggipa Silluk songni kal·chakramo ong·atangaha aro ia tom·bimonganio Garo National Council (GNC), Garo Women Council (GWC), Garo Youth Council (GYC), All Garo Gaonbura Association (AGGA) aro dingtang dingtang dolni dilgiparang baksana Kamrup aro Goalpara a·ja damgnio songdongenggipa bang·a A·chikrang bak ra·angtokaha.
Ia tom·bimonganio, Garo National Council (GNC)-ni general secretary Enindra U Marak, jinmana aganprakengon, skangonin Assam a·doko songdongenggipa A·chikrang Garo Autonomous Council (GAC)-nasa dabiengani gimin Garo Development Council (GDC)-ko ra·chakjachim indiba da·alo Assam Legislative Assembly-ni Deputy Speaker Dr Numal Momin-ni dilanichi GDC-ni gital committee-ko songtaina miksongenga ine janapatenba, iako Assam-ni A·chikrang maming dakeba ra·chakna man·jawa ine parakataha.
Ia tom·anio GDC-ni gitcham chairman Alex K Sangma-ba jinmana aganprakengon, GDC-ko songna skangde ia council-ko GAC-ona ra·doatgen ine Assam sorkari ku·rachakachim indiba da·alonan Assam sorkari, A·chik jatko togie, GAC-na dabianiko chu·sokatchipkujaenga ine parakataha.
“Cabinet-ni ra·chaka gri Assam sorkari, GDC-ko on·e bilsignina cha·bokaha indiba re·anggipa bilsini December 12 tariko Assam Cabinet, GDC-ko ra·chakaha aro ia pilakan Assam Legislative Assembly-ni Deputy Speaker Dr Numal Momin-ni a·selsa ong·aha. Iani a·selsa bilsignina kingking an·ching maming tangka paisani gita chamataniko man·jaha indiba re·anggipa bilsio lak 33-mangni gita tangkarangko chinga man·soaha aro ia tangkarangchin adita namroro silroroani kamrangko a·bachengna man·aha,” ine Sangma aganaha.
Da·alo uamang GAC-na dabiangkuna jinma tik ka·e donangaha aro da·alona kingkingan uamang jegalanirangko dakenga ineba GDC-ni gitcham chairman aganaha.
Ia tom·anio, A·chikrangoni songsalna kam ka·gipa saksa Riya Sangma-ba jinmana aganprakengon, Assam a·doko songdongenggipa A·chikrang, ru·uta bilsirangnin GAC-na dabiengachim aro Assam sorkari bilsiantian tangka paisarangko on·e dakchakna ku·rachakahachim indiba sorkarini ku·rachakgimin gita maming dakchakanirangkon man·jaha ine aganaha.
Assam a·doko A·chikrang, dam 853-mangni gita songrango lak 7-na baten songdongenggiparang donga ine janapatengon, Assam-o A·chikrang jelbra jelsubatsranggipa Tribal jatrangoni dolsa ong·genchimoba chonchonbatgipa jatrangan Autonomous Council-ko man·tokpilaha indiba A·chikrangnade GAC-ni pal GDC-kosa on·steke roskaenga ine Riya parakataha.
GDC-ko GAC-ona ra·doatgen ine ku·rachakahaoba da·o GDC-ni gitcham committee-na on·gimin term bon·srapgijan gital committee-ko Assam Assembly-ni Deputy Speaker Dr Numal Momin songe on·dilna jotton ka·enga ineba Riya matnangataha.