SHILLONG: Opposition dilgipa Mukul Sangma, NPP-ko Gambegre by-poll-na sorkarini bilko jakkalsretenga aro niamko ja·rikgija development program-rangko a·bachengate ong·enga ine matnangaha.
The Shillong Times-ni kobor ra·timgiparang baksa agangrikmitingo Mukul Sangma indine aganaha: ‘NPP, jegita sorkarini bilko jakkale Gambegre constituency-o campaign ka·enga ian namen jajrengani ong·a. NPP, sorkarini bilko jakkalsretenga.
Development program-rangko manderangni nangnikaosa pangchake aro dongimin niamrangko ja·rike kamko ka·na nanga indiba NPP, Gambegre-ni officer-ko niamrangko ja·rikgija kamko ka·china aganenga. Bilo ong·gipa party, indake kamko ka·na man·ja.
“Development kamrangko a·bachengna skang estimate, sanction ba uandakgiparangt donga, aro kamko ka·anio ja·rikna nanggipa niamrang donga. Indiba da·ode Chief Minister an·tangan constituency-ona re·e, ia kamko knalo a·bachenggnok ine aganjolaia.”
Maidake officer, niamko ja·rikgija kamko a·bachengna man·a ine Sangma, sing·doaha. Ia bilo ong·gipa party-ni niamgri kamko ka·ani ong·a.
“Ian niamgri kamrangko ka·ani cholrang ong·a aro ian manderangna seokachi man·gipa bilko jakkalsretani ong·a, ine Opposition dilgipa aganaha.
Uandake TMC, NPP-ni ong·gija kam ka·anirangko sing·dogen aro NPP, maidake aro banoniko indiba tangkarangko jakkalenga, iarangkoba sing·dogen ine Mukul aganaha.
NPP-ko manderangni neng·nikako u·ie chol ra·enga ine matnangaha.
Indake ong·engon party dilgiparang, MLA aro MDC-rang Gambegre-o campaign ka·aniko a·bachengataha aro ua an·tangba ta·raken campaign ka·pagen ine Sangma aganaha.
