Tura: Srik kobor man·e Garo Hills Autonomous District Council (GHADC) Phulbari Forest Range office, meja Sukrobar salo Balujhora songo am·sandianiko dakangaha jeon niamgri chalaigipa ro·ong quarry-ko nike ra·sekaha. Ia quarry-ko chalaia ru·utkuja.
Jolni manderang ua quarry-ni gimin kobor on·ahani ja·man ranger, unim team baksa re·ange sandiaha. Ua quarry-o niamgri gopretanirangko jakkalani gimin jolni manderang jajrenge kobor on·aha.
Ua ro·ong quarry-ko Assam-oni mande niamgri chalaiengachim. Quarry-ko chalaina gita uo maming lekka dongja ba authority-oni on·gipa lekkarang donga, aro darangoba ua sing·chenga dongja. Uandake ua jolo aro sepangjolrango apsan daken bang·en niamgri quarry-rangko chalaigiparang dongako kobor man·aha.
Am·sandiao quarry-oniko machinery, pipe aro gipin bosturangko man·aha, uarangko ra·sekaha. Phulbari Range personnel, mikkangchiba iandake niamgri kam ka·giparangni kosako ja·ku de·na aganaha.
