SHILLONG: University of Science & Technology Meghalaya (USTM)-ni PA Sangma International Medical College & Hospital-na National Medical Commission (NMC)-ko ra·chakangaha aro ia medical college-na NMC-ko ra·chakanio, a·dokni Chief Minister Conrad K Sangma, a·dokni Health Minister Ampareen Lyngdoh, Power Minister AT Mondal, Shella MLA Balajied Kupar Synrem, PA Sangma sagini jikgipa Soradini K Sangma, USTM-ni Chancellor Mahbubul Hoque aro dingtang dingtang official-rangba dongpae bak ra·angaha.
Ia tom·anio a·dokni Chief Minister, jinmana aganprakengon, ia medical hospital-na NMC-ko man·ahani gimin USTM-na an·tangni namgipa skaniko on·angenba, tikkele kamrangko ka·ahani giminsa ia dam 150 seat donggipa medical college-na NMC-ko man·aha ine parakataha.
Ia medical college-na NMC-ko ra·chakahani gimin Union Health Minister JP Nadda, Health Ministry aro official-rangkoba Chief Minister mittelpilangaha.
2008 bilsio USTM Bill-ko pass ka·na gita kamrangko ka·engmiting somoioba uaba kam ka·gipa dolni bak ong·paachim ineba ua aganaha.
“Chadamberangko mande ong·atna tangka paisarangko koros ka·anichi bang·en namgnirangko man·ani giminsa PA Sangma sagi, chadamberango tangka paisa koros ka·aniko bebera·gipa ong·achim,” ine ua aganaha.
PA Sangma sagi, Dr Donkupar Roy sagi aro uandakgipa dingtang dingtang dilgiparangni janggi tangani gimin janapangengon, ia sal somoirango chadamberang, ia dilgiparangni kamrangkosan ong·aigija uamangni bamgipa ong·ani aro gamchatgipa ong·aniko skie ra·na man·a ine Chief Minister aganaha.
Meghalaya a·doko an·seng baljokaniko on·ani kamrango bang·en neng·nikanirang donggenchimoba da·o bewalan namdapaniko nikna man·engaha ineba ua aganaha.
Ia tom·anio, USTM-ni Chancellor Mahbubul Hoque, jinmana rimchaksoani kattarangko aganangengon, ia university-o a·dokni gitcham Chief Minister Dr Donkupar Roy-ko gisik ra·na gita dental college-koba kuligen ine parakataha.
