TURA: Chang 48-gipa 100 Drums Wangala manianiko re·baenggipa November 7 tarikoni 9 tarikona Wangala A·dam Chibragre-o ong·attaienga.
Ia 100 Drums Wangala manianiko bilsiantian 100 Drums Wangala Festival Committee ong·atenga aro ia changoba ia Wangala manianiko ong·atna gita Tourism Department, West Garo Hills District Administration aro gipin dolrang dakchake on·enga.
Ia bilsioba ia 100 Drums Wangala manianiko ong·atanio, Contemporary Folk Song Competition ba A·chikrangni ring·anirang jekai Harara, Nanggorere, Serejing Wal·jan, Sonatchi Boiar, Gogaiwai Gosaiwai, Ang’ Atchiram A·songtang Garo Hills, Chanchiate Aman A·songko, An·sengriri Aiao Angade, Akai Dira, Mewek Mewek Mikoa, Hai Anga Dania aro uandakgipa ring·susaanirangko ong·attaigen ine u·iataha. Classic Folk Song jekai Ajea, Doroa, Dama Doksusaa, Grika aro uandakgipa program-rangkoba ia Wangala manianio ong·atangtaigen.
Bilsi gimiko game ge·e man·gipa mi misina pattigipa ra·rongipa Misi Saljong-ko mittelpilani gita bilsiantian A·chikrang Wangala manianiko dakronga aro uandaken ia dama bol 100 doke Wangala manianiko batanggimin ru·uta bilsirangonin A·chikrang ku·cholsan ong·e manirongbaengachim.
Ia bilsioba ia 100 Drums Wangala manianiko ong·atanio dingtang dingtang songrangoni gimik dol 10 Wangalgipa dolrang bak ra·angtaigen aro una agreba, gipin biaprangoni manderangba ia manianiona re·bae bakko ra·angtaigen ine ka·dongsona man·enga.
