SHILLONG: BSF Meghalaya aro jolni Police, niamgri India-ona niamgri napbagipa sakgniko aro India-ni saksa gari salgipako East Khasi Hillss-ni International border-oniko rim·aha.
Sukrobar sal November 1 tariko BSF Meghalaya aro jolni police bakrime am·sandianiko dakangaha aro niamgri India-ona napbagipa Bangladesh-ni sakgniko rim·aha. East Khasi Hills District-ni sima ari gita niamgri napna jotton ka·ani bidingo kobor man·e 4th Battalion BSF, ta·raken Pynursla Police Station-na u·iataha.
4th Battalion-ni BSF sipairang, Pynursla Police Station baksa bakrime am·sandianiko dakanio Wagon R vehicle (Registration No. ML-05 AC 1946) gariko Pynursla-ni NH 40 ramao champengrike sandiaha. Gariko sandion Bangladesh-ni sakgniko aro India-ni taxi driver ba gari salgipako rim·aha. Aro garikoba ra·sekaha.
