SHILLONG: Gital cement plant ba karkanako kuliani bidingo aditan nangtinggrikanirang ong·enga ine aganengon, development ba namroro-silroroaniko nanga indiba environment-ko gimaatgija aro man·gipa cholrangko gisik seng·e jakkalna nanggen ine UDP General Secretary Jemino Mawthoh Robibaro aganaha.
“Cement plant-ko bikotna am·ani bidingo, pressure group-rang dingtangko aganenga aro songni-nokni manderangara dingtangko aganskaenga indiba songni gadangoni intalan dingtang dingtang stakeholder-rang baksa agangrikaniko dake ma·sichakgrike kamrangko ka·na nanggen. An·chingna namroro-silroroaniko nanga indiba environment-ko nosto ka·e ba nistiatede ong·ja,” Mawthoh aganaha.
“An·ching namroro-silroroaniko nanga aro a·doko man·gipa cholrangko jakkalna nanga indakoba dal·batgipa sing·anide ian, a·doko man·gipa cholrangko an·ching gisik seng·e jakkalna nanggen,” ua aganaha.
Indake ong·engon, “mingsa nangchongmotgipa kamara, jensomoion je kamnan agreement ba ku·rachakgrikaniko daka, uko kakkete ja·rikna nanga. Jedakgipa project-ko jako ra·genchimoba, environment-na nangchakeani dongama dongjawama, uko namedake nichengna nanga. Agreement ba ku·rachakgimin gita ja·rikjaode, niam pe·gipani kosako sastiko on·na nanga,” Mawthoh agandapaha.
Anga darangnaba chake aganjaenga aro darangni kosakoba jegaljaenga iako talen aganenga, “anga namroro-silroroaniko nangnika indiba, jedakgipa obostaoba environment nosto ong·na nangjawa. Jedakgipa project-ko jako ra·oba Environment-na nangchakama nangchakjawa, uko namedake sandie nichengenba tik ong·gipa ja·kuko de·na nanga,” UDP dilgipa aganaha.
