NEHU-o ong·enggipa obostani bidingo CM, Union Education Minister-na sedoata
SHILLONG: Mijal Robibar pringwalo, North Eastern Hill University (NEHU)-ni Vice Chancellor Prof Prabha Shankar Shukla-ni official quarter-ko ma·sina man·gijagipa manderang chadrapenba nosto ka·e galangaha.
Ia a·sel ong·a bakan so·sojeng ong·ani batroroangjana gita district administration-ni official-rang, SP (City) Dara Ashwaghosh-ni dilanichi dolsa police-rang baksa ua biapona re·angaha.
Ia a·selni bidingo sing·sandiaton, dolsa manderangni chadrapanichi, VC-ni official gari, babilsini kelki aina aro babilsini me·dik sam·dikrang nosto ka·ako man·aha ine SP (City) Ashwaghosh parakataha.
Ia manderangni chadrapanio, CCTV camerarang aro bijoli krongrangba nosto ka·ako man·aha.
SP-ni u·iatani gitade, uamangni quarter-ona sokangon, ua biapo NEHU-ni VC dongjachim.
Ia a·selni bidingo NEHU-ni Acting Registrar B Rynjah, Mawlai police station-o FIR ka·aha ineba SP (City) parakataha.
NEHU VC-ni official quarter-o police-rangko donatengaha ineba Ashwaghosh parakataha.
Indake ong·engon, NEHU-o chatro chatrirang aro VC-ni gisepo meligrikna man·jae so·sojengjeng ong·anirang batroroangengahani gimin obostarangko namatna gita a·dokni Chief Minister Conrad K Sangma, Union Education Minister Dharmendra Pradhan-na sedoataha.
Iani bidingo social media-o seachi janapatengon, NEHU-o ong·enggipa obostani gimin Union Education Minister Dharmendra Pradhan-na sedoatenba, ia so·sojengjeng ong·aniko namatchina mol·molataha ine Chief Minister parakataha.
NEHU-o ong·enggipa obostarangni bidingo VC, chatro chatrirang baksa agangrikna skaniko Sonibar salosan parakatahachim.
Indake ong·genchimoba, NEHU-ni VC Prof Shulka kam watjaskal, uamang unbaksa agangrikna okamaniko ra·chakjawa ine NEHU Students Union (NEHUSU) parakatskaaha.
“Chingni okumu chake jingjengataniko a·bachengaoni da·o konta 90 batpilaha indiba da·onan ua chingni jingjengataniko dontonge agangriknasa ua press release-ko on·e dongkuenga. Chinga unbaksa agangrikna man·jawaha aro chingni jingjengataniko uni dontongchina mol·molaniara chingni jingjengataniko dontongna jotton ka·anisan ong·aia,” ine NEHUSU-ni general secretary Toniho Kharsati parakataha.