TURA: Budbar salo ong·atanggipa Gambegre by-election-na skang, Mongolbar pringwalni 1:00 bajimango, Gambegre constituency-ni ning·o donggipa Jembragre songni mande saksako kragija dake jak sokaha aro election-ni niamrangko pe·aha ine an·tangni kosako saksa Jostview D Sangma minggipa mandeni FIR ka·angani ja·man, Boldamgre constituency-ni MDC Stevie Marak-ba ia mandeni kosako Damalgre police station-ni officer-in-charge-na FIR ka·pangpilangskaaha.
Jostview D Sangma-ni kosako Boldamgre MDC-ni FIR ka·pangpilani gitade, Mongolbar pringwalni 1:00 bajimango uamang, Chigitchakgre songo Livingstone N Marak minggipa mandeni noko ‘birthday’-na alaniko cha·e Tura-ona re·bapilengachim indiba Jembagre songona sokon, uamangko Jostview D Sangma aro uni manderang, iron rod, gol·dik aro uandakgipa silchidarerangko ra·e ramao champengsoaha.
Marak-ni FIR-o janapangkuani gitade, silchidarerangko ra·e ramao champengsoani ja·man ia manderang, uamangoniko tangka dabiaha indiba uamang tangkako on·na jechakon, ia manderang, uamangko an·tangtangni ra·bitgipa silchidarerangchi dokna satna a·bachengaha. Ia manderangni iandake chadrapna a·bachengon uamang maibakae uamangoni joke katna man·aha aro uamang joljol Tura-ona re·angaha ineba Marak, an·tangni FIR ka·pangpilgipao parakataha.
Songni manderangko pistol mesoke ka·mikkenata ine matnanganiko jegalatskaengon, election-na skangan ua an·tangni pistol-ko Damalgre police station-o donemanaha aro iandake matnanganiara tol·e matnanganisan ong·aia ine Boldamgre MDC parakataha.
Mongolbar pringwalni 1:00 bajimango, Jembragre songni manderang, election-o susaenggipa dolrangni aro candidate-rangni tangka sualaniko champengna nitimengmiting somoio, Boldamgre-ni MDC Stevie Marak, ia songona re·angenba, an·tangko kragija dake jak sokaha aro songni gipin manderangko silchidare mesoke ka·mikkenataha ine iana skang Jostview D Sangma, Damalgre police station-o FIR ka·doangahachim.