SHILLONG: Manipur a·doko National People’s Party (NPP), Bharatiya Janata Party (BJP) sorkario bakrimaniko ra·pilahaoba Meghalaya a·dokode NPP, bakrimaniko watjawa ine BJP a·kangataha.
Meghalaya a·doko MDA sorkarina BJP-an, mongsonggipa party ong·enga aro BJP gride MDA sorkari be·gruaigen ineba BJP-ni dilgiparang a·kangataha.
“Meghalaya a·dokode BJP baksa bakrimaniko NPP watjawa aro watbebegenchimoba uamang maikai a·dokko chalaiskagen? A·dok sorkari grorang namen bang·aha aro a·songo kangal ong·batsranggipa a·dokrangoni damsa ong·enga. Uamang (NPP) BJP gri tangna man·aigen ine chanchienga ong·ode, aiao inmangipa ong·anikosa uamangna nangaignok ong·jaode sorkari be·gruaigen,” ine BJP-ni state vice president aro Tura-ni MDC Bernard N Marak parakataha.
A·bachengode NPP-ko Manipur sorkario watchanggalahachim aro uamang (NPP), sorkario ong·namangmangsa BJP sorkari baksa bakrimaiaha ine janapatskaengon, “Ian Chief Minister Conrad Sangma-ni dilanichi dakmesokanisan ong·aia maina Meghalaya a·dokni Lok Sabha election-o uamang amchepako man·ahani gimin an·tangtangko BJP-oni chel·ate mesokna miksongenga,” ine Marak aganaha.
Manipur a·doko so·sojengjeng ong·anirangko namatchipna man·jaenga ine Manipur a·doko Chief Minister Biren Singh-chi dilenggipa sorkario bakrimaniko ra·pilna gita Robibar salo, National People’s Party (NPP) tik ka·angahachim.
Iani bidingo BJP-ni national president Jagat Prakash Nadda-na seachi u·iatengon, Manipur a·doko obostarang namjabatroroengani gimin uamang suk ong·nikjae, Manipur-o Biren Singh-chi dilenggipa sorkario bakrimaniko ra·pilna tik ka·aha ine NPP-ni national president Conrad K Sangma parakatahachim.
Manipur a·doko ong·enggipa golmalrangko namatanio aro tom·tomaniko ra·bapilanio Manipur a·dokni Chief Minister Biren Singh-ni dilanichi a·dok sorkari chu·sokgipa ong·jaha ineba NPP-ni national president matnangataha.