SHILLONG: A·gilsak gimikchin manienggipa International Day for the Elimination of Violence against Women-ko Meghalaya State Commission for Women (MSCW) Sombar salo me·chikrangni kosako kragija dakaniko champengna gita campaign-ko dingtangmancha me·chikrangna a·ba-chengate on·aha.
Ia campaign-ko December-ni 10 tarikona kingking dakkangkugen, jean International Human Rights Day-ko maniani salba ong·a jekon me·chikrangni bil aro manderangni bilni ding-tanggrikanikoba ma·sie ra·aniba ong·gen. Iako ong·atanio me·chikrangni kosako mikkang nitee daka-nina songsalo mikraksona nanganian ong·a. Ia campaign-ko shillong-ni Don Bosco Square, Laitumkrah-o a·bachengataha.
Meghalya-o me·chik-rangni kosako ong·gija dakanian
batroroenganiko nikna man·a. Indian penal Code (IPC) ning·o me·chik-rangni kosak kragija daka-nio ming 855 mamlarang donga. Aro ming 339 mamlarangara Special and Local Laws (SLL) ni ning.o 2023 bilsio report on·gipa-rang ong·skaa.
Mamlarangoni nangchongmotgipa mingsa drae til·ekanian ong·a jeon ming 670 mamlarangko matchotatkujaenga aro uarangoni ming 24 mamlarangkosan matchotkuenga. Aro una agreba segipachi aro ma·drangrangchi ka·saninggija dakaniko man·ani mamlarangara ming 154 dongaoni ming 142-ni gita matchotkugijagipa ong·skaenga. Aro rim·srukangani mamlarangara ming 131 ong·e da·ona kingkingba dongkuenga, una agreba internet baksa cha·bokka man·ao ga·akgipa ming 483 mamlarangoni ming 451 mamlarang matchotkugija.
Apsandake, Protection of Children from Sexual Offences (POSCO) Act-ni ning·o ga·akgipa gimik ming 1,790 mamlarang matchotkugija dongkuenga, uarangoni ming 108 mamlarangkosan matchotatkuenga. Indake me·chikrangni kosako ong·gija dakaniko dal·e ra·jaenga ine nikna gita man·engon, ia Campaign-ko ong·atani mangsonganiara kakket bichalko man·a mingsa mangsonggipa dake ra·anio tikkelgiparang aro namgipa an·sengbaljokgipa a·songko Meghalaya-ni me·chikrangna ong·atanian ong·a.
