TURA: Mikkangchi chadamberangko dilgiparang ong·na gita tarisamsoanio, ‘Building Young Leaders: Empowering Adolescent Boys and Girls with Transformational Life Skills’ program-ni gita bak Sombar salo, dingtangmancha chatro chatrirangna mande ra·pilskaaniko dakna gita dingtangmancha program-ko Tura-ni District Auditorium-o ong·atangaha aro ia program-ko ong·atanio, Dadenggre Civil Sub-Division-ni Sub-Divisional Officer (Civil) Sumit Kumar Singh, mongsonggipa sokgipa ong·e bak ra·angaha.
Ia program-ko ong·atanio, Tura-ni SDSEO Samuel Ch Marak, Shillong MIG-ni Director Aiban Swer, MIG-ni Program Coordinator June H Warbah aro dingtang dingtang official-rang, skigiparang, aro chatro chatrirangba bak ra·angtokaha.
Ia program-ko ong·atanio, Dadenggre-ni SDO (Civil) Sumit Kumar Singh, jinmana aganprakengon, skigiparang an·tangtangni skulrango chatro chatrirangna nambate skie on·na man·na gita iandakgipa program-rango skigiparangna training-rangko on·e, skigiparangni u·i-ma·sianirangko baridapatanian ia program-ni mongsonggipa pangchakaniba ong·a ine talataniko on·angaha.
Mandeni janggi tanganio bilsi 12-oni bilsi 18-ona ong·gipa bakan namen mongsongbatgipa bak ong·a maina ia bilsirangon bi·sarang, janggi tangani bidingo mongsonggipa skie ra·na nanganirangko skie ra·e dal·drobaengmiting somoi ong·a ineba Singh aganaha.
Ia program-ko ong·atanio dingtang dingtang skulrangoni sakdok chatro chatrirangba, an·tangtangni skie ra·giminko jinmana agan-talate on·angaha aro ia chatro chatrirangara, Nokrek Heights School-ni Kezia Ch Marak, St Mary’s HS School-ni Martha Florence A Sangma, Christian Girls HS School-ni Chrisbiana Liza Ch Sangma, Captain William’s School-ni Dedoang R Marak, Captain William’s School-ni Galiano Liance D Sangma aro Don Bosco School-ni Sarah Angel N Marak ong·a.
Apsan daken, ia program-ko ong·atanio, dingtang dingtang skulni skigiparangba an·tangtangni skie ra·giminko jinmana agan-talate on·angaha.
Ia tom·anio dingtangmancha skie ra·gimin chatro chatrirangna certificate-rangkoba suale on·angjolaha.
‘Building Young Leaders’ program-ni ning·o chatro chatrirangna mande ra·pilskaaniko daka
Date:
Share post:
