SHILLONG: A·songo songdonggipa manderangni cha·bewal-ringbewalni kosako champenganiara ian, Indiani Niam Bidik-o manderangna on·gimin fundamental rights-ko pe·ani ong·a ine NPP Working president aro Cabinet Minister, Marcuise N Marak Mongolbaro aganaha.
Public ba jinmani biaprango manderangni matchu be·en cha·aniko Assam Sorkarini champengna tik ka·ani bidingo Pa Marak iako aganaha.
Manderangni cha·bewal-ringbewalni kosako champengna jotton ka·ani bidingo aganengon, “An·chingni Niam-Bidiko fundamental rights gnang, unigisepon manderangni cha·a-ringani bewalko champenggenchimode ua fundamental rights-ko pe·a ga·akenga,’’ Pa Marak aganaha.
“An·ching A·songara Democracy a·song ong·a, unigimin an·ching jekoba cha·na-ringna jakgitel ong·a. Unigimin mandeni cha·bewal-ringbewalni kosako Sorkarini champenganikode, je sorkarini dakakoba anga an·tangde ra·chakna man·ja” ineba ua agandapaha.
Ua indakeba aganankuaha je, ‘‘Jedakgipa cha·anirangkoba cha·na an·chingo bil donga. An·ching bang·a cha·anirangkon cha·a, uarangko cha·aniko champenggenchimode ian nama kam ong·ja.”
Assam Cabinet-o Cattle Preservation Act, 2021-ko taridapenba, jinmani romram biaprango, hotel, restaurant-rangko man·chape uandakgipa biaprango matchu be·en cha·aniko champengataniko re·anggipa Butbaro ra·chake donangahchim.
Matchu be·en cha·gijagipa manderangni jelgipa biaprangode matchu be·en pala botanirangkoba dakjachina gita ia Act-o ra·gatahachim.
Matchu cha·aniko champenganiara fundamental rights-ko pe·a: Marcuise
Date:
Share post:
