Resubelpara: North Garo Hills district Resubelpara-o A•we Festival 2024-ko Sukrobar saloni a·bachengataha. Festival-o district-ni dingtangmanchagipa daka-rika bewalrangko December 13 aro 14 tariko mesokanggen.
Deputy Speaker aro Resubelpara-ni MLA Timothy D Shira, chief guest ong·e ba mongsonggipa sokachakgipa ong·e bakko ra·mitingo North Garo Hills-ni District Administration-ko iandakgipa namgipa festival-ko ong·atanina de·mittelaha.
Maiba neng·nikarangchi festival-ko batanggimin bilsi brina ong·atna man·jahachim, indake ia bilsi a·bachengtaiaha, ian district-ni manderangna uamangni changa-sapanirangko mesokatna namgipa chol ong·a, jolni business ba bading-chiwalanirangko namdapatna aro jolni economic-ko ra·dona man·gen.
Indake Speaker Timothy D Shira, re·baenggipa bilsirango A•we Festival-ko nambate dakangna district-ni MLA-rang baksa melie tangkarangko on·gilna aganaha.
Mendipathar-ni MLA Marthon J Sangma, jinma manderangna parakatengon, festival-o bak ra·na cholko man·anina kusi ong·ako parakate District Administration-ko festival-o bak ra·china okamatanina mittelaha.
District Level-o ong·atgipa Winter Festival aro A•we festival – iarang event ba program-mangmangsan ong·aiija indiba ian an·ching A·chikrangni daka-rika bewalrangko mesokatna, jolo man·gipa bosturangko palna aro socio economic -ko bariatna namgipa chol ong·a ine Marthon Sangma aganaha.
North Garo Hills-ni Deputy Commissioner AK Singh, rimchaksoani kattarangko aganprakataon, A•we Festival-ko ong·atani miksonganirangko talate on·angaha.
Niatgenchimode iandakgipa Festival-ko gipin gipin district-rangoba dingtang dingtang bimingrangko done ong·ata. North Garo Hills district-o A•we Festival, Garo jatrangoni dolsa sub tribe ba jatni mande ra·e rimchaksoani bewalko cha·ani-ringani, music aro chrokanina ka·saaniko mesoka.
Festival-ko a·bachengate on·a ja·man Timothy D Shira, Medical, agri-horti departments, fisheries, DCIC aro dingtang dingtang department-rangni dongipa stall exhibition-ko parakate on·aha.
Health ATM-koba a·bachengate on·aha, ian rang·san body vitals screening ba test ka·gipa ong·a.
A•we festival-o Flowers aro Vegetables show, Indigenous games, cooking competition, singing competition, dance competition, beauty contest, baby show aro rock concert ba uandakgiparang donggen.
