SHILLONG: Meghalaya a·doko drugs ba pekatgipa samrangko jakkalani aro badingsrukanirangko bon·atna kam ka·anio a·dok sorkari, dingtang dingtang dolrang, gittimrang aro NGO-rang baksa bakrime kamko ka·na tik ka·angaha.
Iani bidingo talataniko on·angengon, a·doko pekatgipa samrangko jakkalani aro sam badingsrukanirangko bon·atna gitade, apsan nangrime kamko ka·na nanggen ine a·dokni Chief Minister Conrad K Sangma parakataha.
“Drugs jakkalani aro badingsrukaniko bon·atna kam ka·anio sorkarimangmangchide chu·sokgipa ong·na man·jawa ine chinga nikaha. Uni gimin rehabilitation centre-rangko chalaianio sorkari baksa bakrimna gita chinga dingtang dingtang gittimrang, NGO-rang aro gipin dolrangni dakchakanikoba nangenga. Ia centre-rangko chalaina gita sorkari, pilak nanga dakchakanirangko on·gen aro ian sorkarini centre-rangko kuliana bate nambatgipa ong·gen,” ine Chief Minister aganaha.
Iandakgipa rehabilitation centre-rangko, je biaprangon drugs jakkalanirang batachim, uandakgipa biaprangonaba ra·anggen aro ja·mano pilak a·jarangoba donatgen ineba Chief Minister parakataha.
“Chinga man·a dipetde rehabilitation centre-rangko donna nangnikenga aro ia centre-rangko drugs jakkalbatgipa biaprangoni a·bachenggen. Ja·mano iandakgipa centre-rangko pilak a·jarangonan ra·anggen,” ine ua aganaha.
Meghalaya a·doko drugs jakkalgiparang lak 3-na baten donga ine kobor on·gipani bidingo sing·on, iani bidingo name am·sandichengna nanggen indiba ian a·doko simsakbatna nanganiko mesokani ong·enga ine Chief Minister aganaha.
“Drugs jakkalgipa lak 3-ba ong·naba gnang ba lak 1 ba 10,000-ba ong·naba gnang indiba an·ching drugs jakkalgiparang dongna nangjaha. Angni nikaniode a·doko drugs jakkalgiparangan dongna nangja. Uni gimin drugs ra·baanikon champengna nangchongmotenga,” ine Sangma aganaha.