SHILLONG: Meghalaya Democratic Alliance (MDA) sorkariko dilenggipa National People’s Party (NPP)-ni gisepo bilna susagrikanirang dongengani giminsa Meghalaya State Investment Promotion Facilitation Act (MSIPFA) 2024-koba sorkari ra·gataha ine Meghalaya Pradesh Congress Committee (MPCC)-ni president Vincent H Pala matnangataha.
Pilak kamrangkon jaktango ra·na jotton ka·enga ine a·dokni Chief Minister Conrad K Sangma-ko matnangatengon, “Iani giminsa sorkari, Industries department-ni ning·o single-window agency-ko bon·ataha. Da·o IMA-ko Chief Minister-ni jako ra·enggipa Planning Department-ni ning·o ong·atahani gimin a·doko mongsonggipa karkanaranko kulina gita a·dokni Chief Minister, private investor-rangko ra·bana chu·gimik bil dongaha,” ine Pala parakataha.
Industries department-ko a·dokni Deputy Chief Minister Sniawbhalang Dhar-sa dilengachim ine nikna man·a.
Iani bidingo kobor ra·timgipa manderang baksa agangrikengon, investment policy-ko ia bilsini March jao a·bachengataoni a·doko invest ka·anio tang·doaniko nikna man·kujaenga ine Pala aganaha.
“Ia kamara namen bakrodugaa aro dakna nanggnirang bang·ani gimin private investor-rangba dingtang dingtang project-rangna invest ka·anio suk ong·niktokaenga,” ine ua aganaha.
Skango Industries department-ni IMA baksa chalaigipa single-window agency-ni pal sorkari, Meghalaya State Investment Promotion Facilitation Act (MSIPFA) 2024-ko ra·gatskaaha ineba MPCC-ni president talataniko on·angaha.
Investor-rangna a·arangko on·na gita Invest Meghalaya Authority (IMA)-na bilko on·ahaoba jatko dilenggipa dolrangni kosakode sorkari re·badena man·jawa ineba Pala aganaha.
“Indiba Meghalaya Land Transfer Act 1972-ko sorkari taridapkujani gimin mamingan dingtangkuja. IMA gita a·arangko bikotna sorkari, Nokma, Dorbar Shnong aro Hima-rangni no-objection certificate (NOC)-ko nangkuaigen,” ine Pala aganaha.
 |
ReplyForward
|