West Jaintia Hills, Meghalaya-ni Thangrain songni Nokma, uamangni bilni ning·o onge namgija daka rikaniko dakjachina rakgipa niamrangko on·aha. Indake ia songo picnics, aro churing chupekani aro tangkana kal·ani aro gipin namgijagipa dakanirangko tourists biaprango dakjachina champenganiko on·aha. Songrebagipa manderangba wa·al rangko jakkalani ja·mande uko chu·gimik kimmitchina gitaba uamang u·iataniko on·aha, una agreba namgijagipa a·selrang ong·jana gita Nokma, signboards-koba tariaha jean wal 7 PM dipetde ua biaprango rona gita man·jawahachim. Indake ua biaprango ong·gija kattarangkoba agan golpona ba dakna ka·naba gita man·jawa ineba rakkean beng·aha. Ia ge·etanirangko manijaode tangka 5000-ko gamna gita nanggen aro uko gamjaode songo nirok simsakgipa manderang uko dal·gipa bichal ka·gipaona ra·anggen ineba tik ka·manaha. Ia chanchirimaniko songni manderang, jensalo uamangni songko rongtalatengon bang·a chu bottle aro gipin plastic bikaprangko man·ahani ja·mano, uamang ia niamrangko done songko noko rongtal an·talao dona gita miksongaha.
